किन बारम्बार विवादमा फस्दैछ संवैधानिक परिषद्को सिफारिस ?

काठमाडौं- राजधानीबाट प्रकाशित बिहीबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

कसैले नेताहरुको गलामा धान्नै नसक्ने माला लगाइने गरेको विषयलाई मुख्य समाचार बनाएका छन् भने कसैले संवैधानिक परिषद्ले बारम्बार विवादित व्यक्तिहरुलाई सिफारिस गर्ने गरेको विषयलाई प्रमुख खबर बनाएका छन् । 

आजको कान्तिपुर दैनिकले संवैधानिक परिषद्का सिफारिस बारम्बार विवादित शीर्षकमा मुख्य समाचार छापेको छ । पछिल्लो पटक मुस्लिम आयोगको अध्यक्षमा सिफारिस भएका समिम मियाँ अन्सारीको नागरिकतामा दुईथरी जन्ममिति रहेको खुलासा भएपछि परिषद्को सिफारिस विवादित देखिएको हो ।

परिषद्ले यसअघि सिफारिस गरेका अख्तियारका पूर्वप्रमुख आयुक्त लोकमानसिंह कार्की, पूर्वआयुक्त राजनारायण पाठक, पूर्वप्रधानन्यायाधीश गोपाल पराजुली र न्यायाधीश दीपकराज जोशी पनि विवादमा फसेका थिए । परिषद्ले सिफारिस गर्ने गरेका व्यक्तिहरुमध्ये विवादमा परेका अधिकांशको उच्च नैतिक चरित्रमै प्रश्न उठ्ने गरेको समाचारमा उल्लेख छ । 

यस्तै कान्तिपुरले कांग्रेस सांसद् उमा रेग्मीले संसद्मै नियमावली च्यातेको विषयलाई पनि प्राथमिकताका साथ छापेको छ ।

स्थानीय पूर्वाधार विकास साझेदारी कार्यक्रममा आफूलाई भूमिका नदिएको भन्दै समानुपातिक सांसद रेग्मीले संसदमै नियमावली च्यातेर विरोध जनाएकी हुन् । एउटै हाउसमा बस्ने सांसदबीच किन मान मर्दन गरिएको भन्दै उनले प्रश्न गरेकी थिइन । 

आजको नागरिक दैनिकले भने नेताको गला धान्नै नसक्ने माला शीर्षकमा मुख्य समाचार छापेको छ ।

नेपाली राजनीतिमा नेताले धान्नै नसक्ने गरी फूलको माला लगउने प्रचलन केहि वर्षयता संस्कृतिकै रुपमा विकासित हुँदै गएको छ । यसरी माला लगाउन पाउदा नेता, मन्त्री, मुख्यमन्त्री, प्रधानमन्त्री, राष्ट्रपति मख्ख पर्ने गरेका छन् । हाम्रा नेताहरुमा आफूलाई राजाकै प्रतिनिधि ठान्ने भावना र जनतामा अहिले पनि रैतिको भावना भएकाले नै माला संस्कृति मौलाएको समाचारमा उल्लेख छ ।  

यसै विषयलाई नयाँ पत्रिका दैनिकले पनि मुख्य समाचार बनाएको छ ।

उसले लेखेको छ- १२१ किलोको माला लगाएर कोइरालाहरुले भने हामी एक छौँ । १५१ किलोको माला लगाएर सभापति देउवाले भने कांग्रेस कोइरालाका छोरा नातीको होइन । प्रधानमन्त्री केपी शर्मा ओलीले पनि डोटी पुगेर ५१ किलोको माला पहिरिएर भने– यो इतिहासकै उत्कृष्ट सरकार । माला लगाएरपछि नेताहरुले जोसिएर भाषण गर्ने गरेका छन् । 

यस्तै नयाँ पत्रिकाले अस्ट्रेलिया नेपाली विद्यार्थीको बिचल्ली भएको विषयलाई पनि प्राथमिकताका साथ छापेको छ । 

अनुमति नै नपाएको कलेजमा पढ्न १२ सय विद्यार्थीलाई भर्ना गरिएको थियो । ती विद्यार्थीहरुको अहिले बिचल्ली भएको छ । नेपाली दूतावासका अनुसार विभिन्न तह र विषय अध्ययन गर्न ३५ हजार नेपाली अस्ट्रेलिया पुगेका छन् ।तर,  धेरैजसो विद्यार्थीहरु ठगिने गरेको समाचारमा उल्लेख छ ।
 
आजको अन्नपूर्ण पोस्ट्ले भने डलर सञ्चिति घटेको र अख्तियारका पूर्वआयुक्त राजनारायण पाठकमाथि अकूत सम्पति आर्जन गरेकोमा पनि छानबिन थालिएको विषयलाई मुख्य समाचार बनाएको छ।