सप्तरीको स्वास्थ्य शिविरमा प्रधानसेनापतिको निरीक्षण

काठमाडौं- प्रधानसेनापति महारथी पूर्णचन्द्र थापाले बुधबार सप्तरीको सदरमुकाम राजविराजमा संचालन भईरहेको बृहत निस्शुल्क संयुक्त शल्य चिकित्सा घुम्ति शिविरको अवलोकन गर्नुका साथै खोटाङस्थित शेर गणको समेत निरीक्षण भ्रमण गरेका छन्। 

सोही क्रममा प्रधानसेनापति थापाले उक्त मेडिकल शिविरको स्वास्थ्य उपचार सम्बन्धी गतिविधिहरुको जानकारी लिएर  श्री शेर गणको स्थलगत वस्तुस्थिति, तालिम, बन्दोबस्तीलगायत अन्य विविध पक्षबारे समेत जानकारी हासिल गर्नुको साथै सकलदर्जालाई सम्बोधन गरी बुधबार काठमाण्डौ फिर्ता भएका छन्। 

स्वास्थ्य तथा जनसंख्या मन्त्रालयको सहकार्यमा नेपाली सेनाले संचालन गरेको उक्त मेडिकल शिविर मिति फागनु १ गते उपप्रधान एवं स्वास्थ्य मन्त्री उपेन्द्र यादवद्वारा समुद्धाटन भएको थियो। 

हालसम्म उक्त मेडिकल शिविरबाट २१६ जना सल्यक्रियाका बिरामीहरु सहित बीस हजार नौ सय ५५ जनाले स्वास्थ्य उपचारको सुविधा लिएका छन् र उक्त शिविर मिति फाल्गुन ११ गतेसम्म संचालनमा रहने छ।