मलेसियालाई पराजित गर्दै नेपालको सुखद सुरुवात 

काठमाडौं- आईसीसी महिला विश्वकप क्रिकेटको एसिया छनोट अन्तर्गत नेपाली राष्ट्रिय महिला क्रिकेट टोलीले सुखद सुरुवात गरेको छ । मंगलबार भएको आफ्नो पहिलो खेलमा मलेसियालाई ३४ रनले पराजित गर्दै सुखद सुरुवात गरेको हो । 

नेपालले दिएको १ सय २७ रनको लक्ष्य पछ्याएको मलेसियाले २० ओभरमा ७ विकेट गुमाउँदै ९२ मात्र रन बनाउन सक्यो । मलेसियाका लागि क्रिस्टिना बरेटले सर्वाधिक २१ रन बनाइन् । त्यस्तै विनिफ्रेद दुराइसिंगमले १८ र साशा अज्मीले १६ रन बनाउन बाहेक अन्य खेलाडीले दोहोरो अंक छुन सकेनन् । 

नेपालका लागि करुना भण्डारी र सरिता मगरले दुई दुई तथा कविता कुँवर र सिता राना मगरले समान एक एक विकेट लिए ।

यसअघि टस जितेर पहिले ब्याटिङ गरेको नेपालले निर्धारित २० ओभरमा मात्र ४ विकेट गुमाउँदै १ सय २६ रन जोडेको थियो । नेपालका लागि सिता राना मगरले सर्वाधिक ४२ रनको योगदान दिईन् । उनले ४० बलमा २ चौकाको सहयोगमा ४२ रन जोडेकी हुन् । त्यस्तै कप्तन रुबिना क्षेत्रीले ३३ रनको योगदान गरिन । रुबिनाले २५ बलमा ३ चौकाको मद्दतमा ३३ रन जोडेकी हुन् ।

नेपालका लागि काजल श्रेष्ठले १६ रन बनाउदा इन्दु बर्माले १३ रनको योगदान गरिन् । बलिङ तर्फ मलेसियाकी सशा अज्मी, जुमिका अज्मी, विनिफ्रेड ड्यूरेइसिंगमले समान एक एक विकेट लिए । नेपालले युएईसँग फेब्रुअरी २२ मा आफ्नो दोस्रो खेल खेल्नेछ ।