अत्तरियाले विराटनगरलाई पराजित गर्दा महेन्द्रनगर प्लेअफमा

धनगढी- तेस्रो संस्करणको धनगढी प्रिमियर लिग (डिपिएल)मा लिग चरणको आफनो अन्तीम खेलमा सिवाइसी अत्तरियासँग १० रनले पराजित हुँदै विराटनगर किङ्स प्रतियोगिताबाट बाहिरिएको छ । विराटनगर बाहिरिदा महेन्द्रनगर युनाइटेडलाई फाइदा पुगेको छ । विराटनगर पराजित भएसँगै समान अंक भएको महेन्द्रनगर रन रेटका आधारमा प्लेअफमा पुगेको हो । 

अत्तरियाले दिएको १ सय ४९ रनको लक्ष्य पछ्याउने क्रममा विराटनगर २० ओभर खेल्दै ८ विकेटको क्षतिमा १ सय ३८ रन मात्र बनाउन सक्यो । विराटनगका लागि आरिफ शेखले सर्वाधिक ३९ रन जोडे पनि टोलीको जितका लागि प्रयाप्त भएन । 

उनले ३४ बल खेल्दै तीन चौका र दुई छक्का प्रहार गरे । पृथु बास्कोटाले ४ चौकाको मद्दतमा २७ रन जोडे । त्यस्तै असद उल्ला खान १३, अभिनास यादव १४, करन केसी १२ रनमा पेभिलिएन फर्किए ।

अत्तरियाका लागि दिपेन्द्र रावत र भुवन कार्कीले समान तीन तीन विकेट लिँदा कप्तान दिपेन्द्र सिंह ऐरीले एक विकेट लिए । 

यसअघि सन्नी पटेल र जयकिसन कोल्सावालाको आक्रमक अर्धशतकीय अविजित पारीको मद्दतले अत्तरियाले २० ओभरमा मात्र तीन विकेट गुमाउँदै १ सय ४८ रन जोडेको थियो । उत्कृष्ट सुरुवात गरेको अत्तरियाका लागि जयकिसन कोल्सावालाले ५१ रनको अर्धशतकीय अविजित पारी खेलेका थिए । 

उनले ५० बलको सामना गर्दै ५ चौका र २ छक्का गरे । त्यस्तै निकै नै आक्रमक ब्याटिङ गरेका सन्नी पटेलले ६१ रनको अविजित अर्धशतकीय पारी खेले । उनले ३१ बल खेल्दै ५ चौका र ४ छक्का प्रहार गरे । पटेलले खेलको अन्तिम ओभरमा मात्र २४ रन जोडेका थिए । जितेन्द्र सिंह ठकुरी १३, कप्तान दिपेन्द्रसिंह ऐरी १० रनमा पेभिलियन फर्किए । 

विराटनगरका लागि अभिनास यादव र सुसन भारीले एकएक विकेट लिए । यस हारसँगै विराटनगरको दोस्रो चरणको यात्रा टुङ्गीएको छ । अब अत्तरियाले आफ्नो लिग चरणको अन्तिम खेल काठमाडौं गोल्डेनससँग मंगलबार दिउँसो १ बजे खेल्ने छ ।