काठमाडौंसँग रुपन्देहीको १०० रनको लज्जासपद हार

धनगढी- कागजी रुपमा हेर्दा सबै भन्दा बलियो मानिएको टोली रुपन्देही च्यालेन्जर्स काठमाडौं गोल्डेन्ससँग १ सय रनको फराकिलो अन्तरले पराजित भएको छ । तेस्रो संस्करणको धनगढी प्रिमियर लिग (डिपिएल)को आफ्नो चौथो खेलमा रुपन्देही काठमाडौंसँग प्रतियोगिताकै अहिले सम्मकै फराजिला अन्तरले पराजित भएको हो ।

निकैनै बलिया मानिएका रुपन्देहीका खेलाडी काठमाडौंका बलर सामु खुलेर खेल्न नसक्दा रुपन्देहीले लज्जासपद हार व्यहोरेको हो । विनोद भण्डारी, प्रदिप ऐरी, बाबार हायात र पुनित मेहरा जस्ता नाम चलेका खेलाडी चल्न नसक्दा रुपन्देही कागजी मात्र बलियो टोली देखिएको प्रस्ट भएको छ । 

काठमाडौंले दिएको १ सय ३४ रनको लक्ष्य पछ्याएको रुपन्देहीले १५.१ ओभरमा सबै विकेट गुमाएर मात्र ३३ रन बनाउन सक्यो । रुपन्देहीका चार जना खेलाडीले समान तीन रन जोडे । यस खेलमा सुमित महर्जनले जोडेको ५ रन रुपन्देहीका लागि सर्वाधिक रन हो । 

रुपन्देहीले ५ रन जोड्दा पहिलो विकेट गुमाएको थियो भने ९ रन हुँदा दोस्रो, १० रन हुँदा तेस्रो, १२ रन हुँदा चौथो र पाँचौ विकेट गुमाएको थियो । त्यस्तै १८ रन हुँदा छैटौं, २१ रन हुँदा सातौं, २६ रन हुँदा आठौं, ३१ रन हुँदा नवौं र ३३ रन हुँदा अलआउट भयो ।

काठमाडौंका लागि नन्दन कुमार यादवले तीन, ललित राजवंशी र सुर्य तामाङले दुई दुई विकेट लिँदा अंकित दवास र योगेन्द्रसिंह कार्कीले एक एक विकेट लिए ।

यसअघि टस जितेर पहिले ब्याटिङ गरेको काठमाडौंले निर्धारित २० ओभरमा ७ विकेट गुमाउँदै १ सय ३३ रन जोडेको थियो । काठमाडौंका लागि अंकित दवासले सर्वाधिक ४३ रन जोडे । उनले ४० बल खेल्दै १ चौका र ३ छक्काको मद्दतमा ४३ रन जोडेका हुन् । अनिल कुमार साह २३, योगेन्द्रसिंह कार्की १३, ज्ञानेन्द्र मल्ल १२, मेहबुब आलमल ११ र गौरभ तामोर ८ रनमा आउट भएका थिए । रसिद खान १४ रनमा अविजित रहे ।

रुपन्देहीका लागि अनिल खरेल, बिक्रम सोब र पुनित मेहराले दुई दुई तथा ललितसिंह भण्डारीले एक विकेट लिए । यसजितसँगै काठमाडौं अंक तालिकको शीर्ष स्थानमा रहेको छ । काठमाडौं यसअघिनै प्ले-अफमा पुगिसकेको थियो ।