हिउँदे झरी अझै लम्बिने : यस्तो हुनेछ तीन दिनको मौसम

काठमाडाैं- भू-मध्य सागरको वायुको प्रभाव पटक–पटक दोहोरिँदा हिउँदे झरी अझै लम्बिने भएको छ । आज आइतबार मौसममा केही सुधार भएपनि भोलि सोमबारदेखि पुनः देशभरिकै मौसम प्रभावित हुने मौसम पूर्वानुमान महाशाखाले जनाएको  छ । 

पश्चिमी वायुको प्रभावले गएको बिहीबारदेखि देशभरको मौसम बदली भैरहेको छ । आइतबार भने मौसममा केहि सुधार हुने मौसमविद् मीनकुमार अर्यालले जानकारी दिए । उनका अनुसार अहिले देशका केही ठाउँमा कुहिरो लागेको भए पनि विस्तारै हट्दै गएर दिउँसो घाम लाग्ने छ । तर, पश्चिम पहाडी भेग र पूर्वका केही ठाउँमा भने मेघ गर्जनसहित पानी पर्ने सम्भावना रहेको उनले बताए । 

सोमबारबाट पुनः मौसम प्रभावित हुने मौसम पूर्वानुमान महाशाखाले जनाएको  छ । अर्को पश्चिमी वायु पुनः भित्रिने र त्यसले पश्चिमी पहाडी क्षेत्र र मध्य क्षेत्रमा वर्षा गराउने मौसमविद् अर्यालले जानकारी दिए । मंगलबार पनि मौसम प्रभावित हुने भएको छ । काठमाडौं उपत्यकासहित मध्य र पूर्वी पहाडी क्षेत्रमा वर्षा हुने जनाइएको  छ ।

बिहीबारदेखि आएको मौसमी प्रणाली केही कमजोर भएर शुक्रबार देशभरको मौसम सफा भए पनि शनिबार फेरि देशका विभिन्न ठाउँमा मेघ गर्जनसहित पानी परेको थियो । यो वर्ष गएको पुस २३ गते काठमाण्डौ उपत्यकामा पहिलोपटक हिउँदे वर्षा भएको थियो । त्यसपछि भने लगातार रुपमा पश्चिमी वायुको भित्रिरहेको छ । लामो समयसम्म घाम पनि लाग्न सकिरहेको छैन । 

मौसम पूर्वानुमान महाशाखाले जारी गरेको सुचनाअनुसार यस्तो हुनेछ तीन दिनको मौसम । 

फाल्गुन ०५ गते (आइतवार)

दिउँसो : देशभर मौसम सामान्यतया सफा रहने देखिन्छ तथापि पहाडि भेगमा अपरान्ह पछि आंशिक बदलिको संभावना छ।  पूर्वी र पश्चिमि पहाडी भू-भागमा अपरान्ह पछि एक वा दुई स्थानहरुमा मेघ गर्जन सहित छिटफुट वर्षाको सम्भावना छ।

राति : देशभर मौसम सामान्यतया सफा रहने देखिन्छ तथापि पश्चिमि पहाडि भेगमा आंशिक बदलिको संभावना छ। पश्चिमि पहाडि भेगका एक दुई स्थानमा मेघगर्जन सहित हल्का वर्षाको संभावना छ ।

फाल्गुन ०६ गते (सोमवार)

दिउँसो : देशको पश्चिमि भु-भाग लगायत पूर्वी तथा मध्य पहाडी भूभागमा आंशिक वदली रहने र बाँकी भूभागमा मौसम सामान्यतया सफा रहने देखिन्छ । देशको पश्चिमि पहाडि  भू-भागका थोरै स्थानहरुमा र मध्य र पूर्वी पहाडि भेगका एक दुई स्थानमा मेघ गर्जन सहितको हल्का वर्षाको सम्भावना रहेको छ। देशकाे पश्चिमि भागका उच्च पहाडी र हिमाली भेगहरूमा हल्का हिमपातको सम्भावना रहेको छ ।

राति : देशको पश्चिमि भूभागमा सामान्य देखि पूर्ण वदली रहने तथा मध्य र  पूर्वि पहाडि भूभागमा आंशिक बदलि रहने देखिन्छ | पश्चिमि भु-भागका केहि स्थानहरुमा तथा मध्यका १-२ स्थानमा हल्का वर्षाको संभावना रहेको छ। देशका उच्च पहाडी र हिमाली भेगहरूमा हल्का हिमपातको सम्भावना रहेको छ ।

फाल्गुण ०७ गते (मंगलवार)

दिउँसो :देशको पश्चिमि भेगमा सामान्य बदलि रहनेछ भने देशको अन्य भू-भागमा आंशिक बदलि रहने देखिन्छ। पश्चिमि भेगका केहि स्थानमा हल्का वर्षाको संभावना छ भने मध्य र पूर्वी पहाडि भेगका थोरै स्थानमा हल्का वर्षाको संभावना छ। देशका उच्च पहाडी र हिमाली भेगहरूमा हल्का हिमपातको सम्भावना रहेको छ ।

राति : देशको पश्चिमि भेगमा आंशिक बदलि रहनेछ भने अन्यत्र मौसम सामान्यतया सफा रहनेछ।