आजका अखबार : वाइडबडीको छानबिन अलपत्र

काठमडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् ।

आजको नयाँ पत्रिकाले वाइडबडी छानबिन अलपत्र परेको विषयलाई मुख्य समाचार बनाएको छ ।

संसदीय समितिले गरेको छानविन अस्विकार गर्दै आफैले छानविन गर्न भनेर सरकार गएको पुष १९ गते छानविन आयोग गठन गरेको थियो । तर, उक्त आयोगले कामै सुरु नगरि शनिबार म्याद सकिएको छ । आयोगमा नियुक्त गरिएका पदाधिकारीले ४५ दिनसम्म नियुक्तिपत्र समेत नपाएको समाचारमा उल्लेख छ । 

यस्तै नयाँ पत्रिकाले नेकपाको राष्ट्रिय अभियान ६ महिनादेखि अलपत्र परेको विषयलाई एङ्कर न्यूज बनाएको छ । एकिकरण प्रकृया नै पर धकेलिएपछि अहिलेसम्म यो अभियान अघि बढेको छैन । केन्द्रीय कमिटीको बैठक ९ महिनादेखि बस्न नसकेको समाचारमा उल्लेख छ । 

त्यस्तै नयाँ पत्रिकाले सेनाको प्लटिङले सर्वसाधारणलाई सास्ती ढल निकास अवरुद्ध शीर्षकमा अर्को विशेष खबर छापेको छ । किर्तिपुर बसिबसाउ बस्तीको तल खोल्सा मिचेर सेनाले प्लटिङ गर्दा माथिल्लो क्षेत्रको ढल अवरुद्ध भएको छ भने सेनाले बनाएको ढलमा बस्तीको पानी मिसाउन नदिएको समाचारमा उल्लेख छ । 

कान्तिपुर दैनिकले संविधान जारी भएयताको साढे ३ वर्षमा अनियमितता र विवादमा मुछिएका संवैधानिक पदाधिकारीमाथि कुनै कारबाही नभएको विषयलाई मुख्य समाचार बनाएको छ । लोकमानसिंह कार्की, पोपाल पराजुली, दीपकराज जोशी र राजनारायण पाठकमाथि कुनै कारबारही नभएको समाचारमा उल्लेख छ । 

मनाङमा हिउँमै स्कूल खुलेको विषयलाई पनि कान्तिपुरले प्राथमिकताका साथ छापेको छ ।

फागुन १ गतेबाट मनाङका २६ मध्ये १५ स्कूल खुलेका छन् । पुषमै वार्षीक परिक्षा सकेर जाडो र हिमपात छल्न विद्यार्थी र अभिभावक काठमडौं पोखरा लगायतका सहर झरेका थिए । उनीहरु अहिले विद्यालय हाजिर हुन पुगेको समाचारमा उल्लेख छ । 

आजको नागरिक दैनिकले भने सरकारी अस्पतालको अस्तव्यस्त इमर्जेन्सी कक्षका विषयमा मुख्य समाचार लेखेको छ । विरामीको चाप बढ्दा आकस्मिक कक्षमा शय्यासमेत उपलब्ध गराउन अस्पतालहरुलाई मुस्किल पर्ने गरेको छ । खासगरि राजधानीका वीर अस्पताल र महाराजगन्जको शिक्षण अस्पतालमा बढि समस्या देखिएको समाचारमा उल्लेख छ ।

कमलपोखरीको छाया कम्प्लेक्सः अदालतले अब के गर्ला  ? शीर्षकको खबरलाई पनि नागरिकले प्राथमिकताका साथ छापेको छ । प्रधानन्यायाधीश भएपछि चोलेन्द्रशमशेर राणाले महत्वपूर्ण फैसला गरेको सन्दर्भमा पेसी चढेर प्रतीक्षामा रहेको कमलपोखरी जग्गाबारे मुद्दाले कुन मोड लिई कस्तो नतिजा पाउने हो भन्ने सर्वत्र चासो बढेको समाचारमा जनाइएको छ ।