बार्सिलोनाको जितसँगै मेस्सीको नयाँ रेकर्ड

एजेन्सी- बार्सिलोनाले स्पेनिस ला लिगा फुटबलको शीर्ष स्थानमा ७ अंकको अग्रता बनाएको छ । कप्तान लियोनल मेस्सीको एक मात्र पेनाल्टी गोलको मद्दतले बार्सिलोनाले शीर्ष स्थानमा ७ अंकको अग्रता बनाएको हो । 

शनिबार राति भालाडोरीडमाथि बार्सिलोनाले १-० को संघर्षपूर्ण जित निकालेको हो । घरेलु मैदान क्याम्प नाउमा भएको खेलमा खेलको एक मात्र निर्णायक गोल पहिलो हाफमा भएको थियो । 

पहिलो हाफ सकिन दुई मिनेट बाँकी रहँदा बार्सिलोनाले पेनाल्टी पाएको थियो । उक्त पेनाल्टीको सदुपयोग गर्दै मेस्सीले बार्सिलोनालाई जित दिलाए । त्यसपछि दुबै टोलीबाट कुनै पनि गोल हुन नसक्दा बार्सिलोना विजयी भएको हो । 

यस गोलसँगै मेस्सीले जारी सिजनमा ३० गोल पुरा गरेका छन् । उनले पछिल्ला ११ सिजनमा लगातार ३० गोल भन्दा बढी गोल गर्दै रेकर्ड बनाएका छन् । २००७-२००८ को सिजनमा १६ गोल गरेका मेस्सीले तयसपछिका सिजनमा ३० भन्दा माथी नै गोल गर्दै आएका छन् । 

जितसँगै बार्सिलोनले २४ खेलमा ५७ अंक जोड्दै शीर्ष स्थानमा यथावत रहेको छ । पराजित भालाडोरीड २६ अंक सहित लिगको १५ औं स्थानमा छ ।