पर्वतारोही र पदयात्रीलाई मौसमको अवस्थाप्रति सतर्क रहन अपिल

नेपाल समय | बुधबार, असोज ७, २०८३

नेपाल समय

बुधबार, असोज ७, २०८३

पर्वतारोही र पदयात्रीलाई मौसमको अवस्थाप्रति सतर्क रहन अपिल

काठमाडौं। पर्यटन विभागले शरद ऋतुमा पर्वतारोहण तथा पदयात्राका लागि अनुमति लिएका पर्वतारोही, पदयात्री र सहयोगी कर्मचारीलाई मौसमको अवस्था हेरेर उच्च सतर्कता अपनाउन अपिल गरेको छ।

विभागका अनुसार असोज ९ गते शुक्रबारदेखि ११ गते आइतबारसम्म देशका विभिन्न स्थानमा मेघगर्जन, चट्याङ र हावाहुरीसहित भारी वर्षाको सम्भावना रहेको र वर्षाका कारण भूक्षय, बाढी र पहिरोको जोखिम बढ्नुका साथै हिमाली क्षेत्रमा हिमपात हुनसक्ने पूर्वानुमान गरिएको छ।

मौसम प्रतिकूल भएमा पदयात्रा तथा हिमाल आरोहणका क्षेत्र प्रभावित हुनसक्ने भन्दै विभागले उक्त अवधिमा सकेसम्म यात्रा नगर्न आग्रह गरेको छ। यात्रा गर्नैपर्ने अवस्थामा सावधानी अपनाउन तथा नेपाल सरकार र सम्बन्धित निकायबाट जारी हुने मौसमसम्बन्धी अद्यावधिक सूचना हेरेर योजना बनाउन अनुरोध गरिएको छ।

सामागाउँ, खुम्बु, मनाङलगायत पदयात्रा तथा हिमाल आरोहण क्षेत्रका स्वास्थ्य संस्था तथा काठमाडौं र पोखराका उच्च हिमाली स्वास्थ्य समस्याको उपचार गर्ने स्वास्थ्य संस्थामा निरन्तर र सहज स्वास्थ्य सेवा उपलब्ध गराउनसमेत विभागले सम्बन्धित निकायलाई आग्रह गरेको छ।

प्रकाशित: Sep 23, 2026| 18:35 बुधबार, असोज ७, २०८३