७८ लाख घुस खाने अख्तियारका आयुक्तविरुद्ध महाअभियोग !

काठमाडौं- राजधानीबाट प्रकाशित शुक्रबारका राष्ट्रिय दैनिक अखबारहरुले ओली सरकारको समिक्षा र अख्तियारका आयुक्तको घुस प्रकरणलाई मुख्य समाचार बनाएका छन् । 

प्रधानमन्त्री केपी शर्मा ओलीले सत्ताको बागडोर समालेको एक वर्ष पुरा भएको छ । यसैको सन्दर्भमा बिहीबार उनले देशवासीलाई सम्बोधन गर्दै मुलुकमा आर्थिक समृद्धिको आधारशिला खडा भएको दावी गरेका थिए । उनले सरकारले एक वर्ष राज्यको संरचनागत व्यवस्थापनका लागि खर्च गरेको बताएका थिए । 

उनको भाषणलाई आधार मानेर नागरि दैनिकले ओली सरकाको एक वर्षः समृद्धिको जग बस्यो शीर्षकमा मुख्य समाचार छापेको  छ । यस्तै प्रमुख प्रतिपक्षी दल नेपाली कांग्रेसले सरकार गतिशून्य बनेको भनि टिप्पणी गरेको विषयलाई उपशीर्षक दिएर खबर लेखेको छ । 

अन्नपूर्ण पोस्ट्ले पनि प्रधानमन्त्री ओलीले बिहीबार देशवासीका नाममा गरेको सम्बोधनलाई नै मुख्य समाचार बनाएको छ । उसले खाली भाँडो आधा भरियो शीर्षकमा खबर लेखेको  छ। यस्तै उसले विपक्षी दल कांग्रेसको टिप्पणीलाई पनि प्राथमिकताका साथ छापेको छ । सरकारले सपना मात्रै बाडेको परिणाममुखी काम गर्न नसकेको टिप्पणी गरेको छ । 

कान्तिपुर दैनिकले भने अख्तियारका आयुक्त राजनारायण पाठकको घुस प्रकरणलाई मुख्य समाचार बनाएको छ । उसले पाठकको घूस प्रकरणः कार्यालय अख्तियार, अखडा तीनकुने शीर्षकमा खबर छापेको छ । उनको घुस प्रकरण सार्वजनीक भएपछि सत्तारुढ दल नेकपाले आयुक्त पाठकविरुद्ध महाअभियोगको प्रस्ताव लाने तयारी गरेको छ । 

नागरिक दैनिकले पनि आयुक्त पाठकको घुस प्रकरणलाई एङ्कर न्यूज बनाउँदै राजीनामा नदिए महाअभियोग शीर्षकमा खबर छापेको छ ।

भ्रष्टाचार नियन्त्रणका लागि बनेको अख्तियारकै जिम्मेवार व्यक्तिले घुस लिएको सार्वजनिक भएपछि नेकपाले सार्वजनिक पदको दुरुपयोग भएको भन्दै महाअभियोग प्रस्ताव दर्ता गर्न लागेको हो । उनले मुद्दा मिलाउने बाहानामा ७८ लाख घूस लिएको सार्वजनीक भएको थियो । 

आजको नयाँ पत्रिकाले भने मुलुकमा चाहिने भन्दा ज्यादा सेना रहेको त्यो पनि व्यापार र व्यक्तिगत काममा प्रयोग भएको विषयलाई मुख्य समाचार बनाएको छ ।

जनसंख्याको अनुपातमा चीनमा भन्दा दोब्बर र भारतमा भन्दा तेब्बर सेना नेपालमा रहेको समाचारमा उल्लेख छ । ९६ हजार ५ सय ९९ दरबन्दी रहेको नेपाली सेनामा शान्ति मिसनदेखि व्यपार र घरेलु कामदारसम्म ४१ हजार सैनिक खटिएका छन् । ५५ हजार निष्कृय देखिन्छन् । नयाँ पत्रिकाले कुन कुन ठाउँमा कति सेना खटिएका छन् भन्ने विवरण पनि छापेको छ।