भेरीमा बस खस्दा चारको मृत्यु, छ घाइते

काठमाडौं- नेपालगन्जबाट रुकुमपश्चिमको राडीबजारतर्फ जाँदै गरेको बस भेरी नदीमा खस्दा चार जनाको मृत्यु भएको छ। 

भे १ ख १३२९ नम्बरको बस जाजरकोटको भेरी नगरपालिका-१ को खलंगा-रिम्ना सडक खण्डको पिपेगाउँ नजिकैबाट भेरी नदीमा खसेको हो। जिल्ला प्रहरी कार्यालय जाजरकोटका प्रहरी प्रमुख रविन्द्रबहादुर सिंहका अनुसार घटनास्थलमा चार जनाको शव भेटिएको छ भने ६ जना घाइते भएका छन्। 

घाइते र मृतकको विवरण खुल्न बाँकी छ। बस आज साँझ करिव ७ बजेतिर दुर्घटना भएको हो। दुर्घटना लगत्तै जिल्ला प्रहरी कार्यालय र इलाका प्रहरी कार्यालय रिम्नाको टोली उद्धारमा खटिएको छ। 

दुर्घटनास्थलमा प्रहरी निरीक्षक केशरबहादुर कार्की नेतृत्वमा २५ जनाको प्रहरी टोली खटिएको छ। बस सडकदेखि करिब दुई सय मिटर तल भेरीनदी किनारमा खसेको छ।