पानीजहाज अब सपनामात्रै रहेन  

काठमाडौं- सरकारले पानीजहाज चलाउन कार्यालय स्थापना गरेको छ । 

भौतिक पुर्वाधार तथा यातायात मन्त्रालय अन्‍तरगत ललितपुरको एकान्तकुनमा स्थापना भएको कार्यालयको प्रधानमन्त्री केपी ओलीले उदघाटन गरेका छन् । 

उनले कार्यालयको उद्घाटन गर्दै उनले अब पानी जहाज सपनामा मात्रै सिमित नभएको टिप्पणी गरे । पानीजहाजलाई मजाकमा उडाउनेहरुलाईले अब गतिलो जवाफ पाउने उनको भनाइ छ । कार्यालयमार्फत चाडै पानी जहाज ल्याउने कामले मूर्तरुप पाउने उनको  जिकीर थियो ।  

गत माघ ३ गतेको मन्त्रीपरिषद बैठकले पानीजहाज कार्यालय स्थापना गर्ने निर्णय गरेको थियो । त्यसको एक महिनापछि कार्यालय स्थापना गरिएको हो ।

कार्यालयमा उपसचिवको नेतृत्वमा १६ जना कर्मचारीको दरबन्दी यसअघि नै सरकारले स्वीकृत गरिसकेको छ । कार्यालय स्थापना भएपछि पानीजहाज संचालन गर्ने औपचारिक कार्यको थालनी हुने मन्त्रालयले जनाएको छ । १५ दिनभित्र पानी जहाज कम्पनी दर्ताका लागि सूचना निकाल्ने योजना मन्त्रालयको छ ।