कांग्रेसको बैठक आज पनि बस्दै, नेविसंघका पुराना निर्णय बदर

काठमाडौँ- एक साता भन्दा लामो समयदेखि चल्दै आएको नेपाली कांग्रेस केन्द्रीय कार्यसमितिको बैठक बुधबार (आज) पनि बस्दैछ । महासमितिले पारित गरेको प्रतिवेदनमाथि छलफल चल्दै आएको बैठकमा आजपनि त्यसले निरन्तरता पाउने प्रवक्ता विश्वप्रकाश शर्माले जानकारी दिए । 

कांग्रेसमा केन्द्रीय पदाधिकारी र सदस्य पार्टीको वडा समितिबाटै निर्वाचित हुनुपर्ने विषयमा बहस जारी छ । गत मङ्सिर २८ देखि पुस ८ गतेसम्म भएको पार्टीको महासमिति बैठकले विधान संशोधनको प्रस्तावलाई केन्द्रीय कार्यसमितिले सुझाव समेटेर परिमार्जन गर्न सक्ने गरी पारित गरेको थियो । 

महासमिति बैठकमा मुख्य गरी केन्द्रीय सदस्य पार्टीका वडा तहबाटै निर्वाचित भएर आउनुपर्ने र पार्टीमा आरक्षणको व्यवस्था एक व्यक्तिका लागि एक पटक मात्र हुने व्यवस्था विधानमा राख्न सुझाव आएको थियो । यस विषयमा पार्टीको बैठकमा पक्ष र विपक्षका दुवै धारणा आएका छन् । 

यस्तै कांग्रेसको मंगलबार (हिजो) बसेको बैठकले भ्रातृ संस्था नेपाल विद्यार्थी संघका पदाधिकारीले अघिल्लो मिति राखी गरिएका मनोनयनसम्बन्धी निर्णय बदर गरेको छ । 

संघका अध्यक्ष नैनसिंह महरले पदबाट राजीनामा दिई स्वीकृत भइसकेको अवस्थामा विघटित कार्यसमितिबाट केही मनोनयन भएको जानकारीमा आएपछि पार्टीले पुराना निर्णयहरु बदर गर्ने निर्णय गरेको केन्द्रीय सदस्य एनपी साउँदले जानकारी दिए ।

संघको वर्तमान केन्द्रीय कार्यसमितिको यही माघ २ गते स्वतः म्याद समाप्त भएको थियो । कार्यसमितिको म्याद समाप्त भएपछि संघका अध्यक्ष महरले पार्टी नेतृत्वको निर्देशनअनुसार माघ २८ गते पदबाट राजीनामा दिएका थिए । उनको राजीनामा सोही दिन स्वीकृत भएको थियो ।