मोटरसाइकल दुघटना हुँदा तीन घाइते

जनकपुरधाम – सरस्वती पूजाको दिन मोटरसाइकल दुर्घटना हुँदा जनकपुरमा तीनजना घाइते भएका छन्। जनकपुरबाट धनुषाको महेन्द्रनगरतर्फ जाँदै गरेको अवस्थामा विपरित दिशाबाट आइरहेको ट्रयाक्टर एक आपसमा ठोक्किएपछि जनकपुरको मुजेलियास्थित मैदा मिल नजिक दुर्घटना भएको हो।

ज १२ प ६१६३ नम्बरको मोटरसाइकल र वपरित दिशाबाट आउँदै गरेको ना ६ त ३५५१ नम्बरको ट्रयाक्टर ठोक्किएर दुर्घटना भएको प्रहरीले जनाएको छ।

दुर्घटनामा मोटरसाइकल चालक जनकपुरधाम–१७ तेतरिया बस्ने १८ वर्षीय मुत्रा यादव, मोटरसाइकलमा सवार नगराईन नगरपालिका डेवडिहा बस्ने १५ वर्षीय अमित यादव र शहीदनगर नगरपालिका–४ बालाबाखरका १६ वर्षीय बालकृष्ण यादव घाइते भएका छन्।

घाइतेहरु मध्ये मुत्रा र अमितको अवस्था गम्भीर रहेको प्रहरीले जनाएको छ। दुबैजनाको दाहिने खुट्टामा गम्भीर चोट लागेको बताइएको छ। तीनैजनालाई उपचारका लागि जनकपुर अञ्चल अस्पतालमा भर्ना गरिएपनि उपचार संभव नभएपछि थप उपचारको लागि काठमाण्डौं रेफर गरिएको प्रहरीले जनाएको छ।

दुर्घटना भएको मोटरसाइकल र ट्रयाक्टर प्रहरीले नियन्त्रणमा लिएको छ। तिव्र गतीका कारण अनियन्त्रित भएर दुर्घटना हुन पुगेको प्रत्यक्षदर्शीहरुले जनाएका छन्।

यता सरस्वती पूजाको वहानामा ट्राफिक नियम उल्लंघन गरी मोटरसाइकल चलाउने झण्डै सय जनालाई कारबाही गरिएको छ। सरस्वती पूजाको मौका हेरेर तीनजना सवार, लाइसेन्सलगायतका कागजपत्रबिना मोटर चलाउनेहरुलाई कारबाही गरिएको जिल्ला ट्राफिक प्रहरी कार्यालय धनुषाले जनाएको छ।

सवारी साधन चेकजाँच गर्न ट्राफिक प्रहरीले जनकपुरसहित जिल्लाको विभिन्न स्थानमा चेक प्वाइन्ट खडा गरेको थियो। नियम उल्लंघन गरेर मोटर साइकल चलाउनेहरुलाई कारबाही गरेर आइतबारमात्र करिब ६० हजार राजश्व असुल गरिएको ट्राफिक प्रहरीले जनाएको छ।