धनगढी स्टार्सले गर्यो विदेशी खेलाडी फेरबदल

धनगढी- धनगडी प्रिमियर लिग (डिपिएल)को घरेलु टोली धनगढी स्टार्सले विदेशी खेलाडीमा फेरबदल गरेको बताएको छ । यसअघि भारत मुम्बईका प्रथम श्रेणी क्रिकेटर सागर त्रिबेदीलाई अनुबन्ध गरेको जनाएको स्टार्सले खेलको पूर्वसन्धामा आएर युएईका आमिर हायातलाई अनुबन्ध गरेको स्टार्सका कप्तान सोमपाल कामीले बताए । 

त्रिबेदीलाई भारतकै क्लबबाट अनुमती नदिएका कारण उनी स्टार्समा उपस्थित हुन नसकेको कप्तान कामीले बताए । त्रिबेदी अलराउण्डरको भूमिका निभाउने खेलाडी थिए । त्रिबेदीको स्थानमा अनुबन्धित गरेका आमिर हायात खास गरी बलिंगको कारण चिनिने गर्दछन् । 

तर, उनी ब्याटिङमा पनि उत्तिकै अब्बल छन् । हायातसँग ९ एकदिवसीय र ४ टि-२० अन्तर्राष्ट्रिय खेल खेलेको अनुभव छ । उनले भरखरै मात्र नेपालविरुद्दको तीन एकदिवसीय र तीन टी-२० अन्तर्राष्ट्रिय खेलेका थिए । सुरुवाती २ एकदिवसीय खेलमा ६० रन खर्चेर ६ विकेट लिएका थिए भने अन्तिम खेलमा विकेट लिन नसक्दा ५१ रन दिएका थिए ।

त्यस्तै सुरुवाती टि-२० खेलमा १ विकेट लिन ३४ रन खर्चिंदा दोश्रो खेलमा समान १ विकेट लिन २७ रन दिएका थिए । निर्णायक तथा अन्तिम खेलमा मात्र १६ रन खर्चेर २ विकेट लिएका थिए । यस्तै अर्का खेलाडीका रुपमा युएईकै रोहन मुस्तफालाई अनुबन्धित गरेको छ । मुस्तफाले नेपालसँगको एकदिवसीय र टी-२० सिरिज प्रतिबन्धका कारण गुमाएका थिए ।

धनगढीको टोलीमा सोमपाल कामीसंगै पवन सर्राफ, दिपेश श्रेष्ठ, सौरभ खनाल, बिपिन खत्री, हरि बहादुर चौहान, अमित श्रेष्ठ, राजु रिजाल, रोबिन क्षेत्री, सुनील धमला, सन्दिप रजाली, धिरज शाही र कृष्ण ऐर रहेका छन् ।