वर्षा र हिमपात जारी : चिसोले जनजीवन प्रभावित

काठमाडौं – पश्चिमी वायुको प्रभावले आज पनि देशैभर बदली र वर्षा हुने मौसम पूर्वानुमान महाशाखाले जनाएको छ। बिहीबारदेखि मौसममा आएको खरावी सुधार हुन केही दिन लाग्ने महाशाखाले  जनाएको हो।

आज देशभर सामान्यदेखि पूर्ण बदली रही पश्चिम र मध्यको धेरै स्थानमा हल्का र केही स्थानमा भारी वर्षाको सम्भावना महाशाखाले औँल्याइएको छ। 

महाशाखाका मौसमविद् सुजन सुवेदीले पश्चिमी वायुको प्रभावले बदली र वर्षा गराएको जानकारी दिए। उनका अनुसार यो मौसमी प्रणालीको असर आगामी आइतबारसम्मै देखिनेछ। 

शुक्रबार देशभर सामान्यदेखि पूर्ण बदली रहनेछ भने शनिबार मध्य र पूर्वी भेगमा बदली र हल्का वर्षाको सम्भावना छ। आइतबार पनि पहाडी भेगमा बदली र उच्च हिमाली क्षेत्रमा हिमपातको सम्भावना रहेको महाशाखाले जनाएको छ। 

वर्षा र हिमपातका कारण यता देश भरको जनजीवन प्रभावित बनेको छ।