देशभर मौसम बदली : कतै हिमपात कतै पानी पर्ने

काठमाडौं –  पश्चिमी वायु पुनःसक्रिय भएका कारण आज काठमाडौं उपत्यकासहित देशैभरको मौसम पुनः प्रभावित भएको छ। मौसम पुनः धुम्मिएको छ भने काठमाडौं उपत्यकासहित देशका अधिकांश स्थानमा वर्षा भइरहेको छ। 

मौसममा आएको खराबीका कारण हल्का वर्षा र हिमपात हुन सक्ने मौसम पूर्वानुमान महाशाखाले जनाकारी दिएको छ। महाशाखाका अनुसार आज देशभर सामान्यदेखि पूर्ण बदली रहने छ। 

पश्चिमि र मध्य भेगका धेरै स्थानहरुमा हल्कादेखि मध्यम वर्षा र पूर्वि भेगका केहि स्थानहरुमा हल्का वर्षा हुने प्रबल संभावना रहेको र पश्चिमिका साथै मध्य भू–भागका केहि स्थानहरुमा भारी वर्षासमेत हुने सम्भावना रहेको जनाइएको छ। देशको उच्च पहाडी तथा हिमाली भेगका अधिकांश स्थानहरुमा हल्कादेखि मध्यम हिमपातको संम्भावना रहेको छ। 

मध्य तथा पश्चिमी  उच्च पहाडी तथा हिमाली भेगको केही स्थानहरुमा भारि हिमपातको पनि सम्भावना रहेको महाशाखाले जानकारी दिएको छ। मौसम पूर्वानुमान महाशाखाले आगामी तीन दिनसम्मको मौसम पूर्वानुमानसम्बन्धी बुलेटिन निकालेर पश्चिमी वायुको प्रभावले तीन दिन मौसममा खराबी आउने जानकारी गराएको छ।