कांग्रेस बैठक : नेविसंघबारे फेरि किचलो

​​​​​काठमाडौं-  नेपाली कांग्रेसको भातृ संस्था नेपाल विद्यार्थी संघको वर्तमान कार्यसमिति भंग गर्ने वा म्याद थपेर निरन्तरता दिनेबारेमा बुधबार पनि टुंगिएन। 

माघ २ गते थपिएको म्याद सकिएको नेविसंघको वर्तमान कार्यसमितिका बारेमा छलफल गर्न बसेको कांग्रेस केन्द्रीय कार्यसमितिको बुधबारको बैठकमा नेताहरूबीच विवाद भएपछि बैठक बिहीबारलाई सारिएको छ।उपसभापति विमलेन्द्र निधिले नेपाल विद्यार्थी संघको वर्तमान कार्यसमिति भंग गरेर महाधिवेशन आयोजक कमिटी बनाउने प्रस्ताव राखेका थिए।

बैठकमा संस्थापन पक्ष नैनसिंह महर नेतृत्वको वर्तमान कार्यसमितिलाई विघटन गरेर महाधिवेशन  गर्न तदर्थ समिति गठन गरिनुपर्ने प्रस्ताव राखेको छ। यसमा वरिष्ठ नेता रामचन्द्र पौडेल पक्ष केही लचिलो देखिएको छ। तर गठन गरिने तदर्थ समितिको स्वरुप र मापदण्डबारे पौडेल पक्षको फरक मत छ।

अर्का नेता कृष्णप्रसाद सिटौला अहिलेकै कार्यसमितिलाई निरन्तरता दिएर महाधिवेशनमा जानुपर्ने पक्षमा छन्। सिटौलाले वर्तमान कार्यसमिति विघटन गर्दा विवाद बढ्ने र यसले महाधिवेशन नै अन्योलमा पर्ने तर्क राखेका छन्।

पार्टीले विधान संशोधन गरेर थप गरेको नेविसंघको वर्तमान कार्यसमितिको अवधि पनि  माघ २ गते समाप्त भइसकेको छ। तर कांग्रेसले माघ १० गते बस्‍ने केन्द्रीय समिति बैठकले गर्ने निर्णयानुसार हुने भन्दै महर नेतृत्वको कार्यसमितिलाई वैधानिकता दिएको थियो।   

कांग्रेस केन्द्रीय कार्यसमितिको बुधबारको बैठकले माघ २१ गते राष्ट्रव्यापी प्रदर्शनमा भएको लाखौंको सहभागितालाई आभार प्रकट गर्दै छोटो समयमा भव्य प्रदर्शन अयोजना गर्ने सबै जिल्लाको पार्टी पंक्तिलाई बैठकले बधाई ज्ञापन गरेको छ। प्रदर्शनको समाचार व्यापक रुपले सम्प्रेषण गर्ने सबै संचार माध्यमलाई पनि बैठकले धन्यवाद ज्ञापन गरेको छ।