आजका अखबार : किन सुध्रेन अझै आर्थिक सूचकहरु ? 

काठमाडौं- राजधानीबाट प्रकाशित बुधबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

नागरिक र अन्नपूर्ण पोस्ट्ले उखु किसानलाई परेको अन्याय र उनीहरुको व्यथालाई मुख्य समाचार बनाएका छन् भने कान्तिपुर र नयाँ पत्रिकाले मुलुकको अर्थतन्त्रमा समस्या देखिएको विषयलाई प्रमुखताका साथ छापेका छन् । 

आजको कान्तिपुर दैनिकले सरकारको पहिलो वर्षः सूचक किन सुध्रेन ? शीर्षकमा मुख्य समाचार छापेको छ ।

समाचारमा लेखिएको छ– स्थिर सरकार बनेको एक वर्ष पुग्न लाग्दा पनि आर्थिक सूचकहरु सकारात्मक बनेका छैनन्, अर्थतन्त्रले गति पक्रिन सकेन, बजारमा सुस्ती छाएकोछ, उद्यम बढेको छैन । निजी क्षेत्रका प्रतिनिधिका अभिव्यक्तिले लगानीको उत्साह छैन् ।

आन्तरिक लगानी बढेको छैन, वैदेशिक लगानी अघिल्लो वर्षको तुलानामा घटेको समाचारमा उल्लेख छ। निजी क्षेत्रलाई तर्साउने गरी सरकारमा रहेकाहरुले  दिने अभिव्यक्ति, नियन्त्रणमुखी कानुन र नीजी क्षेत्रको कुरै नसुन्ने सरकारको शैलीले  दुरी बढेको विश्लेषकहरु बताउँछन् । 

यस्तै नयाँ पत्रिकाले पनि मुलुकको अर्थतन्त्र कमजोर बन्दै गएको विषयलाई मुख्य समाचार बनाएको छ ।

उसले अर्थतन्त्रमा समस्या, अर्थमन्त्रालयमा बैठक शीर्षकमा खबर छापेको छ । अर्थमन्त्रीले बोलाएको आकस्मिक बैठकमा राष्ट्र बैंकका गभर्नर, अर्थ र उधोग मन्त्रालयका सचिव तथा निजी क्षेत्रका प्रतिनिधिलाई डाकिएको छ । बैठकमा बैंकमा तरलता संकट, ब्याजदर वृद्धि, व्यवसायीको आन्दोलन र विदेशी लगानी तथा अनुदानमा गिरावटबारे गम्भीर समीक्षा हुने समाचारमा उल्लेख छ । 

नागरिक दैनिकले भने साझा प्रकाशन संकटमा परेको, कानुन नबन्दा स्थानीय तहको काममा बाधा देखिएको र उखु किसानले सबा तीन अर्ब भुक्तानी पाउन बाँकी रहेको विषयलाई पहिलो पृष्ठमा स्थान दिएको छ । 

उखु किसानलाई सधैं अन्याय शीर्षकमा छापिएको मुख्य समाचारमा लेखिएको छ– उखु विक्रिको रकम नपाएपछि सर्लाहीका किसानले आत्मादाहको चेतावनी दिएका छन् । देशभरका किसानले सबा तीन अर्ब भुक्तानी पाउन बाँकी छ ।

अन्नपूर्ण पोस्ट्ले महोत्तरीका उखु किसानको अवस्था समेटेर मुख्य समाचा छापेको छ । नगदे उखु, उधारो व्यथा शीर्षकमा समाचार छापेको उसले वर्ष दिन बित्दा पनि महोतरीका किसानले ६५ करोड पाउन नसकेको उल्लेख गरेको छ ।

यस्तै भेनेजुएला प्रकरणमा  अमेरिकी राजदुतले प्रधामन्त्री केपीशर्मा ओलीसँग छलफल गरेको विषयलाई पनि प्राथमिकताका साथ छापेको छ ।