शीर्षस्थानको लिभरपुलले वेस्टहामसँग बराबरी खेल्यो

एजेन्सी-इंग्लिस प्रमियर लिगमा शीर्षस्थानको लिभरपुल वेस्टहामसँग बराबरीमा रोकिएको छ । सोमबार राती भएको खेलमा लिभरपुल वेस्टहामसँग १-१ को बराबरीमा रोकिएको हो । 

वेस्टहामको घरेलु मैदानमा लिभरपुलले सुरुवाती अग्रता जोगाउन नसक्दा अंक बाढ्न बाध्य भएको हो । खेलको २२ औं मिनेटमा पाहुनाटोली लिभरपुलले सुरुवाती अग्रता लिएको थियो । लिभरपुललाई सुरुवाती अग्रता दिलाउन साडियो मानेले गोल गरे । 

उनले जेम्स मिल्नरको पासमा गोल गरेका थिए । तर, त्यसको ६ मिनेट नबित्दै वेस्टहामका मिचल एन्टोनिओले गोल गर्दै घरेलु टोलीलाई खेलमा फर्काए । उनले फेलिपे एन्डर्सनको पासमा गोल गर्दै घरेलु टोलीलाई हारबाट जोगाए । 

खेलका दुबै गोल पहिलो हाफमा सम्भव भएका थिए । दोस्रो हाफमा आक्रमक खेल प्रस्तुत गरे पनि दुबै टोलीबाट कुनै थप गोल हुन नसक्दा अंक बाड्न बाध्य भएकन हुन् । 

बराबरी खेले पनि लिभरपुलले शीर्षस्थान कायमै राखेको छ । २५ खेल खेलेको लिभरपुल ६२ अंक सहित लिगको शीर्षस्थानमा छ । दोस्रो स्थानको म्यानचेस्टर सिटी भन्दा ३ अंकको अग्रता हो । यस्तै समान खेलबाट ३२ अंक सहित वेस्टहाम १२ औं स्थानमा छ ।