प्रदेश १ मा 'ज्यानमारा' बन्दै टिपर : ९ को मृत्यु, ४३ घाइते

इटहरी- चालू आर्थिक वर्षमा प्रदेश १ मा टिपरले ९ जनाको ज्यान लिएको छ । टिपरको ठक्करबाट घाइते भएका ४३ जना उपचारत छ्न । 

टिपरले सबैभन्दा धेरै मोरङ र उदयपुरमा ३/३ जनाको ज्यान लिएको छ । यस्तै सुनसरी, भोजपुर र सोलुखुम्बुमा एकएकजनाको ज्यान गएको छ ।

सबैभन्दा धेरै टिपर दुर्घटना मोरङमा

उत्तरी मोरङमा धेरै खोलाको दोहन भइरहेको छ ।  नदीजन्य पदार्थ ओसारपसार गर्न यहाँ धेरै टिपर कुद्छन् । १ नम्बर प्रदेश ट्राफिक प्रहरी कार्यालयका अनुसार सबैभन्दा धेरै टिपर दुर्घटना मोरङमा भएका छन् । चालू आर्थिक वर्षमा मोरङमा ६ वटा टिपर दुर्घटना भएका छन् । दुर्घटनामा तीनजनाको ज्यान गएको छ । ज्यान जानेमा गत सोमबार विराटचोकमा मृत्यु भएकी लक्ष्मी ढकालसहित अन्य दुई छन् । कात्तिक १३ गते उत्तरी मोरङकै सुन्दरहरैंचा नगरपालिका १२ मा टिपरले ठक्कर दिएर स्कुटर चालक उदयपुरकी गीता कटुवालको मृत्यु भयो । 

यसपछि मंसिर ११ गते पथरी शनिश्चरेस्थित महेन्द्र राजमार्गमा बाइकलाई ठक्कर दिँदा झापाका पदम राजशंशीको मृत्यु भएको थियो । 

मोरङपछि सबैभन्दा धेरै टिपरले ज्यान लिएको जिल्ला हो उदयपुर । उदयपुरमा चालू आर्थिक वर्षमा चारवटा टिपर दुर्घटना भएका छन् । दुर्घटनामा तीन जनाको मृत्यु भएको छ । भदौ १० गते भएको दुर्घटनामा टिपर चालक सल्यानका ३७ वर्षीय मणिराम थापाको मृत्यु भयो । उदयपुरमै असोज ३ गते भएको पिटर दुर्घटनामा त्रियुगाका १० वर्षीय बालक रोमन कार्कीको मृत्यु भयो भने मंसिरमा टिपरले ठक्कर दिँदा मोटरसाइकल पछाडि बसेका सुमन राईको मृत्यु भएको थियो । 

सुनसरीमा चालू आर्थिक वर्षमा दुई वटा टिपर दुर्घटना भएका छन् । दुर्घटनामा एकजनाको मृत्यु भएको छ । कात्तिक १५ गते दुर्घटनामा परी इटहरी निवासी लक्ष्मण राईको मृत्यु भएको हो । 
भोजपुर र सोलुखुम्बुमा पनि एकएक जनाको ज्यान गएको छ । भदौ ७ गते टिपर धेरै लोड भएर अनियन्त्रित भएपछि सोलु जलविद्युत् आयोजना क्षेत्रमा ३० मिटर तल खसेको थियो । टिपर खस्दा भारतीय नागरिक पवित्र पालको मृत्यु भयो । 

भोजपुरमा पुस १३ गते भोजपुर नगरपालिकाको गुप्तेश्वर क्षेत्रका बन्दै गरेको मध्यपहाडी राजमार्गबाट ६० मिटर तल टिपर खस्यो । सहचालकले चलाएको अनियन्त्रित टिपर खसेपछि सहचालक रविन खत्रीको मृत्यु भयो । 

रोकिएन दुर्घटना

टिपरले 'रस आवर' मा धेरैको ज्यान लिएको भन्दै १ नम्बर प्रदेश ट्राफिक प्रहरी कार्यालयले उक्त समयमा कुद्न निषेध गरेको छ । पुस १ देखि लागू हुने गरी बिहान ९ देखि ११ र दिउँसो ३ बजेदेखि ५ बजेसम्म टिपर मुख्य सडकमा कुद्न निषेध गरेको छ । यसरी निषेध गरे पनि ज्यान लिने काम भने रोकिएन । गत सोमबार बिहान साढे ८ बजे टिपरले मोरङको विराटचोककी ११ वर्षीय बालिका लक्ष्मी ढकाललाई किचेर मार्‍यो । व्यस्त समयमा कुद्न निषेध भएकाले समयमै गिटी पुर्‍याउने नाममा र प्रतिट्रिपको दरले चालकले पैसा खानाले मान्छे मार्ने गरेको टिपरका प्रहरी अधिकारीको भनाइ छ । 

१ नम्बर प्रदेश ट्राफिक प्रहरी कार्यालयका प्रमुख एसपी रवि पौडेलले अब टिपरलाई थप नियमन गर्ने बताए । उनले भने, 'समयसीमा तोक्दा पनि टिपरले मान्छे मार्न रोकेको छैन अब थप नियमन र नियन्त्रका कार्यक्रम आउनेछन् ।'

कत्ति छन् प्रदेश १ मा टिपर ?

पूर्वाञ्चल टिपर व्यवसायी संघका अध्यक्ष गोपाल कार्कीका अनुसार प्रदेश १ मा ४ हजार ८ सय ७९ वटा टिपर छन् । मोरङमा सबैभन्दा बढी १३७६, सोलुखुम्बु र ताप्लेजुङमा सबैभन्दा कम ५/५ वटा छन् ।