सदरमुकामको विवादले उग्ररुप लिएपछि रुकुमकोटमा कर्फ्यू 

रुकुमकोट- रुकुम पूर्वको सदरमुकामका विषयमा देखिएको विवादले उग्ररुप लिएपछि जिल्ला प्रशासन कार्यालयले रुकुमकोटमा कर्फ्यू लगाएको छ । 

स्थायी सदरमुकाम गोल्खाडा कायम गर्ने सरकारको निर्णय कार्यान्यनको मागसहित गोल्खाडा पक्षधरले रुकुमकोटर्मा याली तथा सभा गरी छाड्ने अडान लिएपछि प्रशासनले रुकुमकोटको ठूलो भूगोल समेटेर निषेधाज्ञा जारी गरेको हो ।

सरकारले गोल्खाडामा सदरमुकाम राख्ने निर्णय गरे लगतै रुकुमकोटका स्थानीय आदलत पुगेका थिए । यो विषय अहिले पनि सर्वोच्च अदालतमा विचाराधिन छ । 

अदालतमा मुद्दा विचाराधिन रहेकै अवस्थामा गोल्खाडा पक्षधरले रुकुमकोटमा प्रदर्शन तथा सभा गर्ने अडान लिएपछि प्रशासनले निषेधाज्ञा जारी गरेको हो । रुकुमकोटका स्थानीय कुनै पनि हालतमा कार्यक्रम हुन नदिने पक्षमा थिए । दुबै पक्षबीचको अडानका कारण ठूलो दुर्घटना निम्तिन सक्ने खतरा देखेपछि कर्फु लगाएको प्रमुख जिल्ला अधिकारी मित्रलाल शर्माले जानकारी दिए । 

उनका अनुसार पूर्वमा सिस्ने गाउँपालिका–५ धौलापैरा खोला, पश्चिममा सिस्ने गाउँपालिका–५, रानीकोट उत्तरमा सिस्ने गाउँपालिका–६, को रुकुमगाड हुँदै धाउनेको पाटीघट्टसम्म, दक्षिणमा सिस्ने–५, को रुमालबारा हुँदै सहिदपार्कसम्म कफ्र्यु आदेश जारी गरिएको छ । आइतबार बेलुकी ७ बजेटबाट सुरु भएको कर्फ्यू अनिश्चितकालका लागि भएको जनाइएको छ ।

समस्या बढ्दै गएपछि जिल्लामा सुरक्षाकर्मी थपिएका छन् । समस्या समाधानका लागि शनिबार र आइतबार जिल्ला प्रशासन कार्यालयमा बसेको बैठक विना निष्कर्ष सकिएको थियो । दुवै पक्ष अडानबाट पछि नहटेपछि छलफलमा कुनै निस्कर्ष आउन सकेन ।