टी-२० सिरिज जित्दै नेपालले रच्यो दोस्रो इतिहास

काठमाडौं- भरखरै मात्र युएईसँग २-१ ले एकदिवसिय अन्तर्राष्ट्रिय सिरिज जित्दै पहिलो ऐतिहासिक सफलता प्राप्त गरेको नेपालले दोस्रो ऐतिहासिक सफलता प्राप्त गरेको छ । युएईसँगकै तीन खेलको टी-२० सिरिज पनि २-१ ले जित्दै नेपालले दोस्रो ऐतिहासिक सफलता हात पारेको हो । टी-२० सिरिजको अन्तिम खेलमा युएईलाई १४ रनले पराजित गर्दै नेपालले ऐतिहासिक सफलता प्राप्त गरेको छ । यससँगै नेपालले गुमाएको टी-२० मान्यता समेत स्वतह प्राप्त भएको छ ।
 
बर्षाले प्रभावित १० ओभरमा छोट्याएको खेलमा नेपालले दिएको १ सय ५ रनको लक्ष्य पछ्याउने क्रममा युएईले निर्धारित ओरभमा ८ विकेट गुमाउँदै मात्र ९० रन बनाउन सक्यो ।

युएईका लागि सैमन अन्वरले ३० रन जोडे । उनले २० बल खेल्दै २ चौका र २ छक्का प्रहारेका थिए । गुलाम साब्बरले २५ र मोहमद बुटाले ११ रन जोड्न बाहेका अन्य ब्याट्सम्यानले दोहोरो अंक छुन सकेन् । 

नेपालका लागि करन केसी, ललित राजव‌ंशी र अभिनाश बोहराले दुई दुई विकेट लिए । सोमपाल कामी र सन्दीप लामीछानेले एक एक विकेट लिए ।

यसअघि टस हारेर पहिले ब्याटिङको निम्तो पाएको नेपालले ८ विकेट गुमाउँदै १ सय ४ रन बनाएको थियो । नेपालका लागि आक्रमक ब्याटिङ प्रस्तुत गर्दै युवा ब्याट्सम्यान सन्दीप जोराले २८ रन जोडे । उनले मात्र ११ बल खेल्दै तीन छक्काको मद्दतमा २८ रन जोडेका हुन् ।

त्यस्तै कप्तान पारस १४ बल खेल्दै ४ चौका र १ छक्काको मद्दतमा २९ रन जोडे । विनोद भण्डारीले २१, उपकप्तान ज्ञानेन्द्र मल्लले ११, करन केसी १०, दिपेन्द्र सिंह एरी २, ओपनर पवन सराफ, सन्दीप लामिछाने र सोमपाल कामी रन बिहिन भए । युएईका लागि मोहमद नाभिद र सुल्तान अहमदले २ तथा जाहोर खान, मोहमद बुटा र आमिर हायातले एक एक विकेट लिए ।

नेपालको यस्तो थियो टी-२० इतिहास 

यसअघि टी-२० का दुई सिरिज खेलेको नेपाल जित विहिन थियो । तर, यो सिरिज जित्दै नेपालले इतिहास रचेको छ । सन् २०१४ मा नेपालले पहिलो पटक टी-२० विश्वकप खेलेको थियो । पहिलो पटक टी-२० विश्वकपमा सहभागिता जनाउँदै नेपालले उत्ष्कृट प्रदर्शन गर्यो । उक्त उत्कृष्ट प्रदर्शन कै कारण आईसीसीले नेपाललाई त्यसै वर्ष टी-२० अन्तर्राष्ट्रिय मान्यता दिएको थियो ।

त्यसपछि नेपालले दुई देशसँग टी-२० अन्तर्राष्ट्रिय सिरिज खेल्ने मौमा पाएकाे थियो । तर, दुईटै सिरिज गुमाउन पुग्यो । आईसीसीले टी-२० अन्तर्राष्ट्रिय मान्यता दिए लगत्तै नेपालले हङकङसँग ४ टी-२० सिरिज खेल्ने मौका पायो ।

जुन सिरिज श्रीलंकामा भएको थियो । तर, वर्षाका कारण सिरिजका तीन खेल स्थगित भए । सिरिजको अन्तिम खेलमा हङ्कङसाग पराजित हुँदै नेपालले पहिलो आईसीसी टी-२० अन्तर्राष्ट्रिय सिरिज १-० ले गुमायो । 

त्यसपछि सन् २०१५ मा नेपालले नेदरल्यान्डसँग थप ४ टी-२० सिरिज खेल्ने अवसर पायो । जुन सिरिज टी-२० विश्कप छनोट अघि अभ्यासको रुपमा पाएको थियो । तर, त्यो सिरिज नेपालले ३-१ ले गुमाएको थियो ।

सन् २०१५ मा टी-२० विश्वकप छनोट खेल्दा नेपालले खराब प्रदर्शन गर्यो । जहाँ खराब प्रर्दशन गर्दै नेपाल छनोटको समूह चरणबाटै बाहिरियो । अनि आईसीसी टी-२० अन्तर्राष्ट्रिय मान्यता पाएको एक बर्षमै नेपालले टी-२० मान्यता गुमाउन पुग्यो । 

२९ जुलाई २०१८ मा नेपालले नेदरल्यान्ड र एमसिसिसँग त्रिकोणात्मक टी-२० सिरिज लर्ड्समा खेल्ने मौका पाएको थियो । वर्षाले प्रभावित हुँदा ६ ओभरमा झारिएको खेलमा नेपालले एमसिसिलाई ९ विकेटले पराजित गर्यो । त्यसै दिन नेपाल र नेदरल्यान्डबीचको दोस्रो खेल वर्षाको कारण पुरा हुन सकेन ।