संसद बैठक आज, कांग्रेसले अवरोध नगर्ने

काठमाडौं- संघीय संसदअन्तर्गतका दुबै सदनको बैठक आज (आइतबार) बस्दै छ । राष्ट्रिय सभाको बैठक दिउँसो १ बजेका लागि बोलाइएको छ भने प्रतिनिधिसभाको बैठक अपराह्न ३ बजेका लागि डाकिएको छ । 

दुबै सदनको बैठकमा लगतार अवरोध गर्दै आएको प्रमुख प्रतिपक्षी दल नेपाली कांग्रेसले आज भने अवरोध नगर्ने भएको छ । डा. गोविन्द केसीको अनशन अन्त्य भएको र कांग्रेसका पूर्वसभापतिद्वयको नाममा रहेका दुई अस्पताललाई संघीय सरकार मातहत नै ल्याउने निर्णय सरकारले गरेकाले कांग्रेसले संसद बैठकमा अवरोध नगर्ने भएको हो ।  

डा. गोविन्द केसीको माग सुनुवाई गर्नुपर्ने, र पूर्वप्रधानमन्त्रीद्वय गिरिजाप्रसाद कोइराला र सुशिल कोइरालाको नाममा रहेको अस्पताललाई संघीय सरकार मातहत ल्याउनु पर्ने माग गर्दै कांग्रेसले यसअघि पटक पटक संसद बैठक अवरोध गर्दै आएको थियो ।

डा केसीले अनसनले तोडेको र पूर्वप्रधानमन्त्रीद्वयको नाममा रहेको अस्पताल संघ मातहत ल्याउने निर्णय भएकाले आजको संसद बैठक अवरुद्ध नगरिने कांग्रेसका प्रमुख सचेतक बालकृष्ण खाडले जानकारी दिए । 

यसअघि कांग्रेसको अवरोधकाबीच दुबै सदनबाट सरकारले चिकित्सा शिक्षा विधेयक पारित गराएको थियो ।