चेल्सीको जितमा हाजार्ड र हिगुइन नायक

एजेन्सी- इन्ग्लिश प्रिमियर लिग फुटबलमा चेल्सीले हड्सफिल्ड टाउनमाथि फराकिलो जित निकालेको छ । शनिबार भएको खेलमा चेल्सीले हड्सफिल्ड टाउनमाथि ५-० गोलको फराकिलो जित निकालेको हो ।

घरेलु मैदानमा चेल्सीलाई सहज जित दिलाउन गोन्जालो हिगुइन र इडेन हाजार्डले दुई दुई गोल गर्दा डेभिड लुइजले एक गोल गरे । खेलको १६ औं मिनेटमा हिगुइनले गोल गर्दै चेल्सीलाई सुरुवाती अग्रता दिलाए । 

गत साता युभेन्ट्सबाट चेल्सी आएका हिगुइनको यो डेब्यु गोल समेत हो । पहिलो हाफको अन्तिम मिनेटमा हाजार्डले पेनाल्टीमा गोल गरेपछि चेल्सीको अग्रता दोब्बर बन्यो । ६६ औं मिनेटमा हाजार्डले व्यक्तिगत दोस्रो गोल गर्दै चेल्सीको अग्रता तेब्बर पारे । 

६९ औं मिनेटमा हिगुइनले पनि व्यक्तिगत दोस्रो गोल पुरा गर्दा चेल्सी ४-० ले अघि रह्यो । त्यसपछि खेलको ८६ औं मिनेटमा लुइजले गोल गर्दै चेल्सीलाई ५-० को जित दिलाए ।

जितसँगै चेल्सी आर्सनललाई पछि पार्दै लिगको चौथो स्थानमा उक्लिएको छ  । चेल्सीले २५ खेलबाट ५० अंक जोडेको छ । पराजित हडर्स ११ अंक जोडेर लिगको पुछारमा छ ।