आजका अखबार : देशको अर्थतन्त्र संकटमा !

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

आजको नयाँ पत्रिकाले देशको अर्थतन्त्र सोचनीय अवस्थामा शीर्षकमा मुख्य समाचार छापेको छ ।

समाचारमा व्यापार घाटा दोब्बरले बढेको, विदेशी अनुदान १६ प्रतिशतले घटेको  र वस्तुको बिक्री पनि घटेको जनाइएको छ । विदेशी विनिमय सञ्चिति खुम्चँदै गएको, उद्योगमा लगानी न्यून रहेको, चालु खाता घाटा सवा खर्ब रहेको समाचारमा उल्लेख छ । नयाँ पत्रिकाले मुलुकको अर्थतन्त्रको अवस्था झल्किने चार्ट पनि प्रस्तुत गरेको छ  

नागरिक दैनिकले ठेकेदारको मनपरी, नदिमै क्रसर उद्योग शीर्षकमा मुख्य समाचार छापेको छ । उसैले नेकपाको एकता प्रकृया अलमलमा परेको विषयलाई पनि प्राथमिकताका साथ छापेको छ । एकताका लागि गठन गरेको चौथो कार्यदल पनि सुस्ताएसँगै एकता अन्योलमा परेको हो । 

कान्तिपुर दैनिकले भने भेनेजुएलाबारे बोल्नैपथ्र्यो शीर्षकमा मुख्य समाचार छापेको छ । नेकपाका अध्यक्ष पुष्पकमल दाहाल प्रचण्डले अमेरिकाले भेनेजुएलामाथि हस्तक्षेप गरेको टिप्पणी सहित विज्ञप्ती निकालेका थिए । यसको तरंग नेकपा भित्रै अझैसम्म फैलिरहेको छ । 

यस्तै कान्तिपुरले महासचिवलाई सुविधैसुविधा शीर्षकको खबरलाई पनि प्राथमिकताका साथ छापेको छ ।

समाचारमा लेखिएको छ– संघीय संसद्का महासचिव मनोहरप्रसाद भट्टराईले कानुनले दिएकोभन्दा बढी सुविधा लिएर सरकारी ढुकुटी दुरुपयोग गरिरहेका छन् । विशिष्ट श्रेणीबाट अवकाश लिइसकेका भट्टराई सभामुखको सिफारिसमा महासचिव नियुक्त भएका हुन् । उनले विशिष्ट श्रेणीको पेन्सन र महासचिवको सेवासुविधा दुवै लिएका छन् ।

कानुनमा महासचिव भट्टराईले एउटा गाडी र चालक पाउँछन् । सरकारका मुख्य सचिवसरह पारिश्रमिक पाउँछन् । उनले ५ वटा गाडी र ३ जना चालक लिने गरेको जानकारी संघीय संसद् सचिवालय स्रोतले दिएको छ । उनी मासिक तलब र पेन्सन दुवै लिन्छन् । उनले प्रतिमहिना ५८ हजार ८ सय ८० तलब र ३२ हजार ८ सय ९९ रुपैयाँ पेन्सन (निवृत्तिभरण) बुझ्ने गरेको समाचारमा उल्लेख छ । असारअघिसम्म तलबबाहेक ८० प्रतिशत प्रोत्साहन भत्तासमेत लिने गरेका थिए ।

संघीय संसद्का महासचिव, प्रतिनिधिसभा र राष्ट्रिय सभाका सचिवको पारिश्रमिक, सेवासर्त र सुविधासम्बन्धी ऐनको दफा ७ मा निवृत्तिभरण पाइसकेका व्यक्तिले मासिक तलब र निवृत्तिभरणमध्ये एउटा मात्रै लिन पाइने व्यवस्था छ ।