'सहिदहरुको बलिदानीले लोकतन्त्र विरोधी परास्त' 

काठमाडौं- प्रधानमन्त्री केपीशर्मा ओलीले सहिदहरुको बलिदानीले लोकतन्त्र र मानवअधिकार विरोधीशक्तिहरु परास्त भएको बताएका छन् ।

सहिद दिवसका अवसरमा एक सन्देश जारी गर्दै प्रधानमन्त्री ओलीले सहिदको बलिदानीले ल्याएको लोकतन्त्रको रक्षा गर्ने कर्तव्य सबैको भएको उल्लेख गरेका छन् । 

राणा शासन विरुद्धविं सं १९९७ मा दशरथ चन्द, शुक्रराज शास्त्री, धर्मभक्त माथेमा र गंगालाल श्रेष्ठले गरेको बलिदानीको स्मरण गर्दै प्रधानमन्त्री ओलीले उनीहरुको बलिदानीले  नेपालको लोकतान्त्रिक आन्दोलनप्रति गौरव लाग्ने गरेको बताएका छन् । 

'पुस्तौंदेखि अनवरत् रुपमा लोकतन्त्रका निम्ति संघर्ष गर्दै   नेपाली समाज  संघीय लोकतान्त्रिक गणतन्त्र नेपालको नयाँयुगमा आइपुगेको छ' उनले सन्देशमा भनेका छन् ' राजनीतिक संक्रमण सम्पन्न गरी हामी देशको विकास र आर्थिक सामाजिक रुपान्तरणका लगि केन्द्रीकृत भएका छौं । त्यसैले वर्तमान सरकारले अघि सारेको समृद्ध नेपाल सुखी नेपालीको ध्येय सम्पूर्ण राष्ट्रको साझा लक्ष्य बन्न पुगेको छ ।'

दशकौं अघि क्रान्तीवीरहरुले देखेको राजनीतिक अधिकार प्राप्तीको सपना साकार भएको प्रधानमन्त्रीको सन्देशमा उल्लेख छ ।  प्रधानमन्त्री ओलीले समाज रुपान्तरण र देश निर्माणको प्रक्रियामा सहभागी भएमा सहिदहरुप्रति सच्चा श्रद्धान्जली व्यक्त गरेको ठहरिने जनाएका छन् । 'यस  परिप्रेक्ष्यमा म देशको आर्थिक सामाजिक रुपान्तरणको प्रकृयामा सहभागी भई नेपाल आमाका ती महान सपुतहरुप्रति साँचो अर्थमाश्रद्धाञ्जलि अर्पण गर्न सबैमा आव्हान गर्दछु ' प्रधानमन्त्री ओलीको सन्देशमा उल्लेख छ ।