नेपाल एकदिवसीय सिरिज जित्न आतुर, यस्तो छ ‘हेड टु हेड’

काठमाडौं- नेपालले शुक्रबारदेखि युएईसँग तीन एकदिवसीय र तीन टी-२० अन्तर्राष्ट्रिय क्रिकेट सिरिज खेल्दैछ । खेल नेपाली समय अनुसार शुक्रबार बिहान ११ः१५ बजेबाट सुरु हुनेछ । उक्त युएईसँगको सिरिजपछि नेपाल एकदिवसीय र टी-२० अन्तर्राष्ट्रिय वरियतामा आउनेछ । 

अहिलेसम्म युएई र नेपालबीच १५ खेलमा भेट हुँदा युएई निकै अगाडी छ । जसमा युएईले ११ खेलमा जित हात पारेको छ भने नेपालले तीन खेलमा जित हात पारेको छ । एक खेलमा भने दुबै टिमले बराबरी खेलेका छन् । पछिल्लो समय भने नेपाली क्रिकेटको प्रदर्शन पहिले भन्दा फेरिएको पनि छ । 

यो पटकको युएई टुरमा अधिकांश नेपालका युवा खेलाडीले स्थान नाएका छन् । त्यसमाथि पनि कम अनुभव बटुलेका खेलाडी लिएर टिम नेपाल युएई पुगेको छ । कप्तान पारस, ज्ञानेन्द्र, विनोद, करण, प्रदीप, बसन्तबाहेक सबै खेलाडी भरखरका युवा छन् । दीपेन्द्र, ललितनारायण, आरिफ, सोमपाल, रोहित, सन्दीप जोरा, सन्दीप लामिछाने, अभिनाष, भीम र पवन यी सबै २३ वर्ष भन्दा कम उमेरका छन् । 

पछिल्लो खबर अनुसार टोलीका महत्त्वपूर्ण सदस्य रहेका भेट्रान स्पिनर वसन्त रेग्मी बिरामी परेपछि युवा स्पिनर ललित नारायण राजवंशीले यूएईविरुद्ध शुक्रबार हुने पहिलो एकदिवसीयमा डेब्यु गर्ने सम्भावना प्रबल रहेको छ । वसन्त यूएई आएदेखि ज्वरोले ग्रसित भएका कारण बिहीबार प्रशिक्षणमा सहभागी भएनको खुलासा भएकोछ । 

यता, युएईका मुख्य तीन खेलाडी नहुँदा नेपाललाई केही सहज हुने मनिएको छ । युएईका कप्तान रोहन मुस्तफा, रहमद राजा र रहमद शेहजाद प्रतिबन्धमा परेका कारण नेपालविरुद्धको सिरिजमा सहभागि हुने छैनन् । 

त्यस्तैले यस सिरिजका लागि युएईको कप्तानी मोहम्मद नाभिदलाई दिइएको छ । नेपाली खेलाडी सम्बन्धी राम्रोसँग जानकार भएका नाभिदले पोखरा प्रिमियर लिग र एभरेष्ट प्रिमियर लिगमा संगै खेलेका छन् ।