साफ च्याम्पियनसिप आयोजनाका लागि एन्फा र विराटनगर महानगरपालिकाबीच समझौता

काठमाडौं- पाँचौ साफ महिला फुटबल च्याम्पियनसीप आयोजनाका लागि विराटनगर महानगरपालिका र अखिल नेपाल फुटबल संघ (एन्फा)बीच सम्झौता भएको छ । फागुन २८ गतेदेखि सुरु हुने साफ प्रतियोगिता गराउनका लागि महानगरसँग एन्फको सम्झौता भएको हो ।

सम्झौता अनुसार महानगरले प्रतियोगिता सुरु हुनु १५ दिन अगाडि नै संरचनाहरु निर्माण गरी एन्फालाई हस्तान्तरण गर्नेछ । त्यसैगरी, एन्फाले साफमा सहभागि राष्ट्रका प्रतिनीधि, खेलाडीलाई आमन्त्रण तथा व्यवस्थापन गर्नेछ  ।

प्रतियोगिताका लागि गृहमन्त्रालयसँग समन्वय गर्दै शान्ति सुरक्षाको व्यवस्थापन पनि एन्फाले नै गर्ने  छ । साफ आयोजनाका क्रममा भएका आम्दानी तथा खर्चहरुसमेत महानगरलाई जानकारी गराउने सम्झौता पत्रमा उल्लेख छ ।

यससँगै महानगरले रंगशालाको भौतिक पूर्वाधार निर्माण गर्ने भएको छ । महानगरका मेयर भीम पराजुलीले साफको आयोजना गर्न पाउनु नै विराटनगरका लागि अवसर भएको बताए । 

खेलको माध्यमबाट प्रदेश एकका विभिन्न पर्यटकीय क्षेत्रलाईसमेत टेवा पुग्ने बताउँदै उहाँले पहिलो अन्तराष्ट्रिय प्रतियोगिताको आयोजनामा कुनै कमीकमजोरी आउन नदिने प्रतिबद्धता व्यक्त गरेका छन् ।

सम्झौताका क्रममा एन्फाका अध्यक्ष कर्मा छिरिङ शेर्पाले अन्तर्राष्ट्रियस्तरबाट ३ सय बढी प्रतिनिधि, खेलाडी तथा खेल प्रशंसकको प्रत्यक्ष सहभागिता रहने प्रतियोगिताले विराटनगरको गरिमा बढाउने उल्लेख गरे ।