आज लिभरपुलले आर्सनलको सामना गर्दै

एजेन्सी- इंग्लिश प्रिमियर लिग फुटबल अन्तर्गत शनिबार ६ खेल हुँदैछन् । शनिबार रातिको खेलमा  विभिन्न ठुला टोलीले पनि प्रतिस्पर्धा गर्दै छन् । शनिबार शीर्ष स्थानको लिभरपुल र आर्सनलबीचको खेलमा निक महत्वका साथ हेरिएको छ । त्यस्तै अर्को महत्वपुर्ण खेलमा दोस्रो स्थानको टोटेनहमले वुल्भ्ससँग भिड्दै छ । 

लिभरपुलले घरेलु मैदानमा आर्सनलसँग नेपाली समय अनुसार राति ११:१५ भिड्दैछ । घरेलु मैदानमा लिभरपुलको लक्ष्य आर्सनललाई पराजित गर्दै आफ्नो उपाधि होड बलियो बनाउनु हुनेछ ।

लिगमा लिभरपुल दोस्रो स्थानको टोटेनहमभन्दा ६ अंकले अघि छ । दोस्रो स्थानको टोटनहम पराजित भएमा लिभरपुलको अग्रता ९ हुनेछ । यस सिजन उत्कृष्ट प्रदर्शन गरिरहेको लिभरपुलले ५१ अंक जोडेको छ ।

यता, ३८ अंक जोड्दै पाँचौ स्थानमा रहेको आर्सनल लिभरपुललाई स्तब्ध बनाउदै शीर्ष चारमा पुग्ने लक्ष्यमा हुनेछ । लिभरपुललाई हराए आर्सनल चेल्सीलाई पछि पार्दै चौथो स्थानमा उक्लनेछ । 

त्यस्तै अर्को खेलमा टोटेनहमको  मैदानमा हुने खेल ८:४५ मा सुरु हुनेछ । वुल्भ्सविरुद्ध मैदान उत्रदा टोटेनहम सहज जितसहित लिभरपुलसँगको अंक दुरी कम गर्ने योजनामा हुनेछ ।

प्रिमियर लिग अन्तर्गत अन्य खेलमा ब्राइटन र एभर्टन, फुलहम र हडर्सफिल्ड तथा लेष्टर सिटी र कार्डिफ सिटीबीच खेल हुनेछ । त्यस्तै वाट्फोर्डले न्युकासलको सामना  गर्नेछ ।