रोनाल्डोलाई रियलमा समर्थकले समेत सम्झि रहेका छन् : मार्सेलो

एजेन्सी- रियल मड्रिडका स्टार लेफ्ट ब्याक मार्सेलोले रोनाल्डोलाई सम्झिँदै भावुक प्रतिक्रिया दिएका छन् । रियलमा रहँदा रोनाल्डोका सबै भन्दा मिल्ने साथी बनेका मार्सेलोले उनलाई मैदानमा र मैदान बाहिर पनि उत्तीकै सम्झि रहेको प्रतिक्रया दिएका छन् । 

‘संसारकै उत्कृष्ट खेलाडी आफ्नो टोलीमा नरहेपछि उनलाई सम्झिनु स्वभाविक हो ।’ मार्सेलोले भने, ‘जुनै टोली पनि रोनाल्डोलाई आफ्नो टोलीमा रहेको हेर्न चाहन्छ । रियल जहिलेसम्म रियल रहन्छ, खेलाडी आउने-जानेक्रम त चलिरहन्छ ।’ 

उनले थपे, ‘उनी सधैं हाम्रो सहकर्मी र असल साथीका रूपमा रहे । उनी रामोस र मोड्रिचसँग पनि उत्तिकै मिल्थे ।’ यसैबेला मार्सेलोले आफूले र टोलीका अन्य खेलाडीले पनि रोनाल्डोलाई खुबै सम्झि रहेको बताएका छन् । 

यति सम्मकी आफूले खेल्ने हरेक खेलमा रोनाल्डोलाई सम्झिने बताए । रोनाल्डोलाई रियलका खोलाडी मात्र नभई क्लबका समर्थकहरुले पनि उत्तीकै सम्झेका छन् । मार्सेलोले भने, ‘आज भोली खेलका दौरान घरेलु समर्थकको साथ पनि घट्दै गएको छ ।’ 

रोनाल्डोले छोडे पछि लय विहिन भएको रियल लयमा फर्किन संघर्षरत छ । खास गरी रियल यतिबेला टोलीमा उत्कृष्ट गोलकर्ता खेलाडी नहुँदाको संकटबाट गुज्रिरहेको छ । 

रियल ला लिगामा अहिले आफ्नो स्तरअनुसारको स्थानमा छैन भने च्याम्पियन्स लिगमा पनि उसले सन्तोषजनक प्रदर्शन गर्न सकेको छैन । पछिल्लोपटक समूह चरणको अन्तिम खेलमा रियल आफ्नै घरमा आफूभन्दा कमजोर टोली सिएसकेए मोस्कोसँग ३-० ले पराजित भयो । रियलको उक्त हार ९ वर्षयताकै खराब नतिजा थियो ।