लिम्बूले जिते डोको बोकेर दगुर्ने प्रतियोगिताको उपाधि

ताप्लेजुङ– ताप्लेजुङमा आयोजित डोको बोकेर दगुर्ने प्रतियोगिताको उपाधि फक्ताङलुङ गाउँपालिकाका रमेश लिम्बूले जितेका छन्।

औद्योगिक कृषि तथा पर्यटन मेलाका अवसरमा आज आयोजित उक्त प्रतियोगितामा उनले १३ किलोमिटरको दूरी १ घन्टा ४ मिनेट ३१ सेकेन्डमा पूरा गरेर उपाधि चुमेका हुन्। 

प्रतियोगितामा मैवाखोला गाउँपालिकाका प्रकाश लिम्बू दोस्रो भए। उनले निर्धारित दूरी एक घण्टा चार मिनेट ४४ सेकेण्डमा पूरा गरे।

फक्ताङलुङकै छत्रबहादुर कार्की तेस्रा भए। उनले १ घन्टा पाँच मिनेट ३० सेकेन्डमा दूरी पूरा गरे। प्रतियोगितामा एक महिलासहित ३२ जनाले सहभागिता जनाएका थिए। 

फुङलिङस्थित पुरानो बैंकबाट सुकेटार आसपासको सानो पाथीभरा मन्दिरसम्मको १३ किलोमिटरको दूरी सहभागीले १५ किलो बालुवासहितको भारी डोकोमा बोकेर दौडेर पूरा गरेका थिए।

प्रतियोगितामा पहिलो हुनेलाई ३० हजार, दोस्रोलाई २० हजार तथा तेस्रो हुनेलाई १० हजार पुरस्कार प्रदान गरिएको आयोजक घरेलु तथा साना उद्योग महासंघ ताप्लेजुङका अध्यक्ष राजेन्द्र भारतीले जानकारी दिए।