मोरङमा एक जोडी झुण्डिएको अवस्थामा मृत फेला

काठमाडौं- मोरङमा एक जोडीले आत्महत्या गरेका छन्। प्रहरीका अनुसार विवाहका लागि उमेर नपुगे पनि पारिवारिक सहमतिमा सँगै बस्दै आएको एक जोडीले आत्महत्याको बाटो रोजेको हो।

शुक्रबार रंगेली नगरपालिका-२ को खोरिया टोलस्थित कृषि फार्मको लिचीको रूखमा दुवैजना झुण्डिएको अवस्थामा फेला परेका हुन्।

शव भेटिनेमा मोरङको रंगेली-२ का १८ वर्षीय सञ्जय उराव र बेलबारी नगरपालिका-२ की १८ वर्षीया ललिता उराव हुन्। कृषि फार्म भने जनक कार्कीको हो। लिची बगानमा डोरीको पासो लगाएर उनीहरुले आत्महत्या गरेका हुन्।

प्रहरीको प्रारम्भिक अनुसन्धानअनुसार सञ्जय र ललिताको परिवारबीच विवाहका लागि सहमति भएको थियो। तर, उमेर नपुग्दा परिवारले सँगै बसोबास गर्न अनुमति दिएको थियो। उनीहरु एक महिनादेखि सँगै बस्दै आएका थिए।

इलाका प्रहरी कार्यालय रंगेलीको टोलीले घटनाको अनुसन्धान सुरु गरेको छ।