कोशी नामकरणविरुद्धको आन्दोलनमा एकजनाले ज्यान गुमाए

कोशी प्रदेश नामकरणको विरोधमा भएको आन्दोलनमा घाइते भएका पदम लिम्बूको मृत्यु भएको छ। चैत ५ गते विराटनगरमा भएको आन्दोलनमा घाइते भएका लिम्बुको बिहीबार राति ज्यान गएको हो।

विराटनगरमा निषेधित क्षेत्र तोडी मुख्यमन्त्री कार्यालयअगाडि प्रदर्शन गर्न जाने क्रममा सशस्त्र प्रहरीको लाठी प्रहारबाट लिम्बू घाइते भएका थिए। टाउकोमा चोट लागेका उनलाई बुधबार राति बान्ता गरेपछि बीपी अस्पातल धरान लगिएको थियो।

बेहोस अवस्थामा अस्पताल लगिएका लिम्बुको बिहीबार राति मृत्यु भएको पुनः नामांकन संयुक्त संघर्ष समितिले जनाएको छ। घटनाको जिम्मा प्रदेश १ का ८२ जना सांसद, पार्टीहरू, मुख्यमन्त्री हिक्मत कार्की, प्रधानमन्त्री प्रचण्ड एवं नेपाल प्रहरीले लिनुपर्ने भन्दै समितिले विज्ञप्ति निकालेर लिम्बूको हत्या भएको र अनुसन्धान गर्न छानबिन आयोग गठन गर्नुपर्ने माग गरेको छ। उनलाई सहिद घोषणा गर्नुपर्ने पनि माग राखिएको छ।

धरान-१५ मा बसोबास गर्दै आएका लिम्बु संघीय लोकतान्त्रिक राष्ट्रिय मञ्चसम्बद्ध लिम्बुवान भोलेन्टियरका केन्द्रीय सहकमान्डर थिए। उनी २०५२ देखि लिम्बुवान आन्दोलनमा थिए ।