तीन सातामै छक्कापञ्जा ४ ले कमायो १५ करोड

काठमाडौं– नेपाली चलचित्र छक्कापञ्जा ४ प्रदर्शनको तेस्रो सातासम्म पनि घरेलु बक्स अफिसमा निरन्तर उकालो चढिरहेको छ। सिनेमाहलमा चलिरहेका विदेशी (हलिउड, बलिउड) चलचित्रलाई पछि पार्दै छक्कापञ्जा ४ ले घोडे जात्राको सार्वजनिक बिदाका दिन पनि राम्रो आम्दानी गरिरहेको वितरक मनोज राठीले बताए।

उनका अनुसार छक्कापञ्जा ४ सिनेमा हलमा प्रदर्शन थालिएको १८ दिनसम्म करिब १५ करोडसम्म आम्दानी भएको हो। छक्कापञ्जा ४ को कमाइ थप बढ्ने र ५१ दिनसम्मै पर्दामा लागिरहने उनले बताए।

यतिबेला काठमाडौं उपत्यकाका सिनेमाघरमा बलिउड फिल्म तु झूठी मैं मक्कर, साजम : फ्युरी अफ द गड्स, कब्जा र मिसेस चटर्जी भर्सेस नर्वे चलिरहेका छन्। तर छक्कापञ्जा ४ को अकुपन्सी उच्च रहेको राठी बताउँछन्।

छक्कापञ्जा ४ को कुल आम्दानीमध्ये झन्डै ४५ प्रतिशत योगदान मोफसलको रहेको देखिएको राठीको अनुमान छ। फिल्म १९ फागुनदेखि प्रदर्शनमा आएको थियो।