काठमाडौं– सवारीका बेला दुःख दिइरहेको गुनासो सर्वसाधारणबाट व्यक्त भइरहेका बेला नवनिर्वाचित राष्ट्रपति रामचन्द्र पौडेल तामझामबिनाको सामान्य सवारीमै कुमारी घर पुगेका छन्।
शनिबार कुमारी घर पुगेका पौडेलको सवारीका बेला सार्वजनिक यातायात र सर्वसाधारणलाई सुरक्षाकर्मीले निर्वाध आउजाउ गर्न दिए।
राष्ट्रपति कुमारी घरभित्र प्रवेश गर्नुअघि पनि सर्वसाधारणलाई आउजाउमा रोक लगाइएन। राष्ट्रपति पौडेल एक–एक वटा सुरक्षाकर्मीका गाडी अघिपछि लगाएर दिउँसो ४ बजे कुमारी दर्शनका लागि गएका छन्।
राष्ट्रपति पौडेल सवारीमा सुरक्षाकर्मीले प्रयोग गर्ने मोटरसाइकलबिनै वसन्तपुरस्थित कुमारी घर पुगेका हुन्। आज बिहान मात्रै राष्ट्रपति पौडेललाई कुमारी घरको तर्फबाट पूजा–प्रसाद टक्र्याइएको थियो।