त्रिविमा चुनावी चटारो, ११०२ क्याम्पसमा बन्यो निर्वाचन समिति

काठमाडौं– मुलुककै जेठो र राजनीतिक हस्तक्षेपले थला परेको त्रिभुवन विश्वविद्यालय (त्रिवि)को स्वतन्त्र विद्यार्थी युनियन (स्ववियु) निर्वाचनका लागि देशभरका क्याम्पसमा स्ववियु निर्वाचन समिति गठन गरिएको छ।

आगामी ५ चैतमा हुने निर्वाचनका लागि उपत्यकासहित देशभरिका त्रिवि आंगिक र सम्बन्धन प्राप्त क्याम्पसमा स्ववियु निर्वाचन समिति गठन गरिएको हो। 

त्रिवि विद्यार्थी कल्याण तथा खेलकुद निर्देशनालयका निर्देशक पशुपति अधिकारीले सबै क्याम्पसले स्ववियु निर्वाचन गर्न निर्वाचन समिति गठन गरेको जानकारी दिए। प्रत्येक क्याम्पसमा क्याम्पस प्रमुख संरक्षक हुने गरी निर्वाचन समिति गठन गरिएको उनले बताए। 

उक्त समितिले नै क्याम्पसमा स्ववियु निर्वाचन गराउनेछ। त्रिविका सबै आंगिक क्याम्पसमा विद्यार्थी कल्याण प्रमुख रहने व्यवस्था छ। यसअघि त्रिविका शिक्षाध्यक्ष प्राडा शिवलाल भुसालको अध्यक्षतामा १६ सदस्यीय स्ववियु निर्वाचन केन्द्रीय अनुगमन तथा समन्वय समिति गठन गरिसकिएको छ।

निर्देशनालयका निर्देशक अधिकारीले क्याम्पस गठन गरिएको समिति र क्याम्पस प्रमुखलाई जिल्लास्थित निर्वाचन आयोगसँग स्ववियु निर्वाचनमा समन्वय गर्न अनुरोध गरिएको बताए। स्ववियु निर्वाचनका लागि आवश्यक सुरक्षा व्यवस्था मिलाउन गृहमन्त्रालयमार्फत ७७ वटा जिल्लाका प्रमुख जिल्ला अधिकारीलाई पत्राचारसमेत गरिएको उनको भनाइ छ।

‘स्ववियु निर्वाचनको सुरक्षा व्यवस्था मिलाउन गृह मन्त्रालयमार्फत ७७ वटै जिल्लाका प्रमुख जिल्ला अधिकारीलाई पत्राचार गरिएको छ’, उनले भने, ‘क्याम्पस प्रमुखलाई समेत स्थानीय प्रशासनसँग समन्वय गर्न निर्देशन दिएका छौं।’

आगामी ५ चैतमा देशभरका त्रिविका ६२ आंगिक र १ हजार ४० सम्बन्धन प्राप्त क्याम्पसमा हुने स्ववियु निर्वाचनका लागि कार्यतालिकासमेत सार्वजनिक भइसकेको छ।

कार्यतालिका अनुसार १९ फागुनमा विद्यार्थी संघ÷संगठन दर्ता, २१ फागुनमा मतदाता सूची प्रकाशन, २७ फागुन बिहान ११ देखि दिउँसो २ बजेसम्म समानुपातिक तथा प्रत्यक्षतर्फको उम्मेदवारी दर्ता तोकिएको छ। यस्तै, कार्यतालिकाअनुसार ५ चैत बिहान ८ देखि दिउँसो ४ बजेसम्म मतदान तोकिएको छ।

प्रत्येक दुई दुई वर्षमा हुने स्ववियु निर्वाचन २०६५ यता नियमित हुन सकेको छैन। ६ चैत २०६५ मा भएको स्ववियु निर्वाचन एकै पटक आठ वर्षमा १५ चैत २०७३ मा गरिएको थियो।