दुई ठेकेदार कम्पनी कालोसूचीमा

बागलुङ- सात वर्षअघि काम थालेर पटक पटक म्याद थपे पनि दुईवटा पक्की पुल अलपत्र छोड्ने निर्माण कम्पनीलाई डिभिजन सडक कार्यालय बागलुङले कारबाही गरेको छ। 

सार्वजनिक खरिद ऐनको बर्खिलाप गरेको भन्दै कार्यालयले वाई पी कन्स्ट्रक्सन र रफिना निर्माण कम्पनीको ठेक्का सम्झौता रद्द गरेको हो।

डिभिजनकै सिफारिसमा संघीय सडक तथा सुपरिवेक्षण तथा अनुगमन कार्यालयले सबै प्रक्रिया पुर्‍याएर कम्पनीलाई कालोसूचीमा समेत राखेको छ।

ढोरपाटन–५ को भुजीखोला पुल तथा गलकोट–८ र ९ जोड्ने दरमखोलाको पुल अलपत्र पारेपछि डिभिजनले उनीहरूलाई कारबाही गरेको हो। ३ करोड ३४ लाख लागतको पुलको पश्चिमतर्फको एक पिलर मात्र उठाइएको छ। 

ढोरपाटनको अधिकारीचौरमा निर्माण गरिने भुजीखोला पुल वाई पी रफिना संयुक्त निर्माण कम्पनीले ठेक्का लिएको थियो। २०७३ असोज ४ को ठेक्का सम्झौताअनुसार २०७४ को माघ ४ मा सकिनुपर्ने उल्लेख छ। 

लामो समय अलपत्र पारेर अन्तिम पटक २०७७ मंसिर १४ मा थपिएको म्यादमा पनि कुनै प्रगति नभएपछि कार्यालयले ठेक्का रद्दको प्रक्रिया थालेको थियो। गत मंसिर २३ मा कार्यालयको कारबाही गर्ने सूचनाउपर ठेकेदारले उच्च अदालत पाटनमा रिट निवेदन दिएका थिए।