सांसद भण्डारीलाई मुम्बई लगियो

काठमाडौं– नेपाली कांग्रेसका सांसद चन्द्र भण्डारीलाई कृत्रिम श्वासप्रश्वासको सहायतामा भारतको मुम्बईमा रहेको नेशनल बर्न सेन्टर लगिएको छ।

शरीरको करिब ३० प्रतिशत भाग जलन भएका नेता भण्डारीलाई श्वासनलीमा समस्या देखिएका कारण अस्पतालले थप उपचारका लागि अन्यत्र रिफर गरेपछि उनलाई मुम्बई लगिएको हो।

अस्पतालका चिकित्सकले बताएअनुसार भण्डारीको अवस्था गम्भीर छ। श्वासप्रश्वासको नली सुनिन थालेको छ, जसले जटिलता थपेको छ। उनीसँग जाने ६ जना चिकित्सक टोलीमा ३ जना डाक्टर र ३ जना पारामेडिक्स छन्। 

भारतसम्म पुर्याउदा श्वासप्रश्वासमा समस्या नहोस् भनेर कृत्रिम रुपमा मुखबाट पाइप जोडेर श्वासप्रश्वासमा सहजता गराइएको चिकित्सकले बताएका छन्।

काठमाडौंको बुद्धनगरस्थित भाइको घरमा बस्दै आएका भण्डारी र उनकी आमा हरिकला बुधबार राती ग्यास सिलिन्डर पड्किँदा गम्भीर घाइते भएका थिए।

भण्डारीकी आमा हरिकलाको भने बिहीबार बिहान कीर्तिपुर बर्न अस्पतालमा निधन भइसकेको छ।