साफ यू-१८ : समूह विजेताका लागि नेपाल र बंगलादेश भिड्दै 

काठमाडौं-भुटानमा जारी साफ यू-१८ महिला च्याम्पियनसिप अन्तर्गत आज (मंगलबार) नेपाल र बंगलादेश भिड्दै छन् । आफ्नो सुरुवाती खेल जितेका यि दुवै टोलीलाई यो खेल जिते विजेता र उपविजेताको टुङ्गो लाग्ने छ । 

खेल बराबरीमा सकिएको खण्डमा बंगलादेश समूह विजेता हुनेछ । नेपाल र बंगलादेश यस अघि नै सेमिफाइनलमा प्रवेश गरि सकेका छन् ।

नेपालले पहिलो खेलमा पाकिस्तानलाई १२-० को फराकिलो अन्तरले पराजित गरेको थियो । उक्त खेलमा नेपालका लागि रेखा पौडेल एक्लैले ७ गोल गरेकी थिइन् । निकै नै आक्रामक रणनीतिमा खेलेको नेपालले पहिलो हाफमा नै ६ गोल गरेको थियो ।

त्यत्सै यता बंगलादेशले पनि पहिलो खेलमा पाकिस्तानलाई १७-० ले पराजित गर्दै उत्कृष्ट सुरुआत गरेको थियो । पाकिस्तान लिगका दुवै खेलमा पराजित हुँदै बाहिरिसकेको छ । 

प्रतियोगिताको अर्को समूहमा भुटान, माल्दिभ्स र भारत रहेका छन् । सुरुआती दुई खेलमा भुटान र भारतले १-१ जित दर्ता गरेका छन् ।