मेस्सी पीएसजीमा आबद्ध, ३० नम्बर जर्सीमा खेल्ने

काठमाडौं- अर्जेन्टिनी फुटबल स्टार लियोनेल मेसी फ्रेन्च क्लब पीएसजीमा आबद्ध भएका छन्। मेसीले मंगलबार पीएसजीसँग दुई वर्षका लागि सम्झौता गरेका हुन्। 

ला लिगाको आर्थिक मामिलासम्बन्धी नियमका कारण मेसीले केही दिनअघि मात्रै बार्सिलोना छाडेका थिए। ‘पेरिसमा मेरो करिअरको नयाँ अध्याय सुरु गर्नका लागि म निकै आतुर छु। क्लब र यसको सपना मेरो महत्वाकांक्षासँग मेल खाने खालका छन्,’ मेसीले सम्झौतापछि भने।

पीएसजीका अध्यक्ष नासेर अल खेलैफीले मेसीलाई आफ्नो परिवारमा भित्र्याउन पाउँदा निकै खुसी लागेको बताएका छन्।

१३ वर्षको उमेरमा बार्सिलोनामा आबद्ध भएका मेस्सीले ७७८ खेलमा ६७२ गोल गरेका छन्। उनले ६ पटक बलोन डी ओर अवार्ड पाएका छन् भने क्याटलान क्लबलाई ३५ वटा उपाधि दिलाएका छन्। 

यो सिजनमा पीएसजीमा आबद्ध हुने चौथो खेलाडी हुन्। यसअघि पीएसजीले नेदरल्यान्ड्सका मिडफिल्डर जर्जिनियो विज्नाल्डम, स्पेनका डिफेन्डर सर्जियो रामोस र इटालीका गोलरक्षक जियानलुइगी डोनारुमालाई भित्र्याइसकेको छ।

३४ वर्षे मेस्सीले ३० नम्बरको जर्सी लगाएर खेल्नेछन्। नेयमार र एम्बाप्पेजस्ता खेलाडी भएको पीएसजीमा मेस्सी थपिएपछि खेल थप रोमाञ्चक हुने अपेक्षा गरिएको छ।