काठमाडौं- शाहरुख खान र दीपिका पादुकोण अभिनीत फिल्म ‘पठान’ ले बक्स अफिसमा कमाल देखाउने क्रम जारी छ। रिलिजको समयदेखि नै फिल्मले राम्रो कमाइ गरिरहेको छ।
फिल्म सफल भएपछि निर्माता तथा कलाकार उत्साहित छन्। यसैबीच अभिनेत्री दीपिका भने एक कार्यक्रममा रोएकी छिन्। फिल्म सफलताको उत्सव मनाउन मुम्बईको एक होटलमा आयोजित कार्यक्रममा फ्यानको माया देखेर उनी रोएकी हुन्। कार्यक्रममा उनले सम्पूर्ण फ्यानलाई धन्यवाद दिँदै फिल्म सफलताले अभिनेत्रीलाई फाइदा हुने बताइन्।
दीपिकाको ५ वर्षपछि फिल्म हिट भएको हो। यस अगाडि उनको ‘पद्मावत’ हिट भएको थियो। चार वर्षपछि अभिनयमा फर्केका शाहरुख खानको पनि चर्चा उतिकै छ। हिन्दी फिल्मको इतिहासमा ओपनिङ विकेन्डमा सर्वाधिक कमाउने फिल्म समेत बनेको छ पठान। सिद्धार्थ आनन्दद्वारा निर्देशित ‘पठान’ले ‘केजीएफ: च्याप्टर २’ र ‘बाहुबली २’को कीर्तिमानमात्रै तोड्न सकेको छैन।