राष्ट्रिय स्वतन्त्र पार्टीका अध्यक्ष रवि लामिछानेले किसानको उत्पादन मूल्यहीन बनेर सडकमा फाल्नुपर्ने अवस्थाको अन्त्य गर्न आफू लागिपर्ने बताएका छन्। चितवनका किसानले तरकारी सडकमा फ्याँकेको समाचार र तस्बिर सार्वजनिक भएपछि उनले सामाजिक सञ्जालमा यस्तो भनेका हुन्।
फेसबुकमा किसान आन्दोलनको तस्बिरसहित स्टाटस लेख्दै उनले आफूहरुलाई समस्या थाहा भएको र समाधान खोज्ने बताएका छन्। उनले चितवनबासीलाई केही दिनमा भेट्न आउने पनि उल्लेख गरेका छन्।
‘प्रतिकेजी ५ रुपैयाँमा पनि बिक्री नभएपछि सडकमै तरकारी फाल्नुपर्ने बाध्यतामा छन् देशका किसान। देशका किसानले उत्पादन गरेको तरकारीको मूल्य छैन, बजार छैन। किसानले सुनौलो भविष्यको सपना बुन्दै उत्पादन गरेको तरकारी मूल्यहीन बनेर सडकमा फाल्नुपर्ने यो दर्दनाक अवस्थाको अन्त्य गर्न लागिपर्ने छौं,’ लामिछानेले लेखेका छन्।
उनले चितवनबासीसँग पुनः भेट हुने उल्लेख गरेका छन्। चितवन-२ बाट प्रतिनिधिसभाका सांसद बनेर प्रचण्ड नेतृत्वको सरकारमा उपप्रधान एवं गृहमन्त्री बनेका रवि नागरिकता मुद्दामा दोषी ठहर भएपछि आम नागरिक भएका छन्। फेरि नागरिकता लिएर अहिले उनी पुनः गृहमन्त्री बन्न प्रयासरत छन्।