रेफ्रीको निर्णयविरूद्ध एनआरटीको उजुरी

काठमाडौं- शनिबार भएको ए डिभिजन लिगको उद्घाटन खेलमा रेफ्रीको निर्णयमा असन्तुष्टि जनाउदै न्युरोड टिम एनआरटीले अखिल नेपाल फुटबल संघ एन्फामा निवेदन दर्ता गराएको छ । 

करिव पाँच बर्ष पछि शुरू भएको पल्सर सहिद स्मारक ए डिभिजन लिगमा रेफ्रीको गलत निर्णयका कारण अंक बाँड्नु परेको आरोप लगाउनदै एनआरटीले आवश्यक अनुसन्धानकालागि एन्फामा उजुरी गरेको हो ।

उद्घाटन खेलमा फिफा रेफ्री सुदिस पाण्डेको विवादास्पद निर्णयको छानविन गर्न एनआरटीले माग गरेको छ। एनआरटीले रेफ्रीले दिएको पेनाल्टी र अन्तिम मिनेटको फ्रिकिकमा असन्तुष्टि व्यक्त गर्दै छानविनको माग गरेको छ। एनआरटीले छानविनकालागि दिएको निवेदन एन्फा महासचिव इन्द्रमान तुलाधरलाई बुझाएको छ।

‘एन्फाको निर्णय कहिले आउँछ हेरौ । त्यसपछि रेफ्रीलाई कारबाहि नभए लिग नखेल्ने जानकारी गराउछौ ।’ अध्यक्ष बज्राचार्यले भने। दुई पटक खेलमा अग्रता लिएपनि रेफ्री पाण्डेकै कारण अंक बाँड्नु परेको एनआरटीको गुनासो छ ।

क्लब अध्यक्ष दिपकहर्ष बज्राचार्यले रेफ्रीको निर्णयको विषयमा आवश्यक छानविन गर्न माग गर्दै एन्फामा निवेदन दर्ता गरिएको जानकारी दिए ।