चोरीको मोटरसाइकल समात्दा अभियुक्तको साथबाट पेस्तोल बरामद, तीन जना पक्राउ

सुनसरी- चाइनिज पेस्तोल, गोली, लागूऔषध र चोरिएको मोटरसाइकलसहित इलाका प्रहरी कार्यालय इटहरीले तीन जनालाई पक्राउ गरेको छ।

पक्राउ पर्नेमा इटहरी- १५ का ३० वर्षीय सुजित मग्राती माझी र इटहरी १० का १९ वर्षीय मुकेश कोइराला रहेका छन्। उनीहरूले चोरीको मोटरसाइकल कुदाई रहेको र पेस्तोलसमेत रहेको भनी सूचना पाएसँगै इलाका प्रहरी कार्यालय इटहरीबाट खटिएको टोलीले इटहरी-१२ बाट पक्राउ गरेको जनाएको छ।

उनीहरूको साथबाट प्रहरीले १ थान चाइनिज पेस्तोल, सोही पेस्तोलमा लाग्ने ६ राउण्ड गोली, १५० मिलिग्राम ब्राउन सुगर र नाईट्रोसन ट्याब्लेट तथा प्रदेश नम्बर १–०२–०४३ प ६८९७ नम्बरको मोटरसाइकल समेत बरामद गरेको छ। 

यसैगरी इटहरी–११ का ३३ वर्षीय मणि कुमार राईलाई मोटरसाइकल चोरी गरेको आरोपमा चोरी भएको मोटरसाइकलसहित प्रहरीले पक्राउ गरेको छ।

माघ १७ गते इटहरी–१ बाट मोटरसाइकल चोरी भएको भन्ने सूचना पाएसँगै खोजतलासमा खटिएको प्रहरी टोलीले चोरी भएको प्रदेश १–०२–०४६ प ३१२९ नम्बरको बुलेट मोटरसाइकलसहित राईलाई पक्राउ गरेको हो। उनीहरूलाई  पक्राउ गरेर थप अनुसन्धान थालिएको प्रहरीले जनाएको छ।