काठमाडौं- प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले अहिले नै राजनीतिक समीकरण नफेरिने बताएका छन्।
बिहीबार पार्टी स्थायी कमिटी बैठकपछि केन्द्रीय कार्यालय पेरिसडाँडामा सञ्चारकर्मीसँग संक्षिप्त कुराकानी गर्दै दाहालले सत्ता समीकरण फेरबदल नहुने बताएका हुन्।
राष्ट्रिय स्वतन्त्र पार्टीले सरकारलाई दिएको समर्थन फिर्ता लिन सक्ने सम्भावनाबारे पत्रकारहरूले सोधेको प्रश्नमा प्रधानमन्त्री दाहालले रास्वपाले समर्थन फिर्ता नलिने बताए। भने, 'केही हुँदैन। रास्वपाले समर्थन फिर्ता पनि लिनुहुन्न मैले बुझेसम्म।'
सभापति रवि लामिछानेलाई गृहमन्त्री नबनाएपछि सरकारलाई दिएको समर्थन के गर्ने भन्ने विषयमा रास्वपाको केन्द्रीय समिति र संसदीय दल बैठक बसिरहेको छ। नागरिकता मुद्दामा सर्वोच्च अदालतले सांसद पद नै खारेज गरिदिएका सभापति लामिछानेलाई गृह मन्त्रालयको जिम्मेवारी दिनुपर्ने रास्वपाको माग छ। यसमा मुख्य सत्ता साझेदार दल एमालेको पनि जोडबल छ तर प्रचण्ड सकारात्मक छैनन्।