दसैंयता पानी परेको छैन रसुवामा, किसानका हात पुर्पुरोमा

रसुवा- दसैंयता वर्षा नभएपछि रसुवामा लगाइएका हिउँदे बालीमा सिँचाइको अभाव भएको छ। समय-समयमा वर्षा नभएपछि उत्तरी क्षेत्रमा लगाइएका हिउँदे बाली गहुँ, जौ, करू तथा दक्षिणी भेकका गहुँ, तोरी, आलुसमेतलाई सिँचाइको अभाव भएको हो।

सिँचाइ अभावका कारण यस वर्षको हिउँदे खेतीबालीको उत्पादन ५० प्रतिशतले घट्ने अनुमान किसानले गरेका छन्। ‘मंसिरमा पर्नुपर्ने हिउँ अहिलेसम्म नपरेकाले गहुँको बोट भुइँ झारको जस्तै तलै छन्। यसले उत्पादनमा ह्रास आउने सम्भावना देखिएको छ’, स्थानीय किसान याकबहादुर लिम्बूले भने।

हिउँदे बालीको उत्पादनमा कमी आउने देखिएपछि खाद्यान्नको संकट हुने उनको भनाइ छ। यहाँको वृदिम, खैदी, थुमन, चिलिमे, गोल्जुङ, गतलाङ, हाकु, स्याफ्रु, धुञ्चे, राम्चे, यार्सालगायतका स्थान बढी प्रभावित भएका छन्।

यी क्षेत्रमा सिँचाइ नभएको र हिमपातको चिसोमा निर्भर हुनुपर्ने भएकाले पनि किसान बढी चिन्तित भएका हुन्। दक्षिणी भेकको डाँडागाउँ, ठूलोगाउँ, लहरेपौवा, भोर्ले, धैबुङ, सरमथलीलगायतका स्थानमा भने सिँचाइ व्यवस्था भएको जिल्ला समन्वय समितिका उपप्रमुख विजय लामाले बताए।