काठमाडौं– घरझगडा, सम्पत्ति लेनदेन, मायाप्रेमलगायत सामाजिक कारणले प्रायः मानिसले आत्महत्याको असफल प्रयत्न गर्छ। तर नेतालाई मन्त्री बनाउनुपर्ने माग गरेर जुम्लामा सरकारी कर्मचारीले नै आत्मदाहको असफल प्रयास गरेका छन्।
नागरिकता विवादमा सांसद पद गुमाएका रवि लामिछानेलाई पुनः गृहमन्त्री फिर्ता दिन माग गर्दै जुम्लामा एक जनाले आत्मदाह प्रयास गरेका हुन्।जिल्ला प्रशासन कार्यालय प्रांगणमै बाँकेको कोहलपुर स्थायी घर भएका सरकारी कर्मचारी ४० वर्षीय गोकर्ण कार्कीले बिहीबार पेट्रोल खन्याएर आत्मदाह प्रयास गरेको जुम्ला प्रहरीले बताएको छ।
आत्मदाह प्रयास गर्ने कार्कीले भ्रष्टाचारीलाई कारबाही हुनुपर्ने, रविले न्याय पाउनुपर्ने, गृहमन्त्री बनाउनैपर्ने मागसहित प्रशासन कार्यालय अगाडि आत्मदाह प्रयास गरेका हुन्।
कार्की कर्णाली स्वास्थ्य विज्ञान प्रतिष्ठानका सवारी चालक रहेको प्रहरीले पुष्टि गरेको छ। कार्कीले शरीरमा पेट्रोल खन्याएर आत्मदाह प्रयास गर्नेबित्तिकै प्रहरीले जोगाएको जुम्लाकी सहायक प्रमुख जिल्ला अधिकारी प्रमिला रिजालले बताइन्।