राष्ट्रपति र उपराष्ट्रपति निर्वाचनविरुद्ध सर्वोच्चमा रिट

काठमाडौं– सर्वोच्च अदालतमा राष्ट्रपति र उपराष्ट्रपति निर्वाचन रोक्न माग गर्दै रिट निवेदन दर्ता भएको छ। संविधानविपरीत निर्वाचनको मिति तय गरिएको दाबीसहित अधिवक्ता ज्ञानेन्द्रराज आरणले सर्वोच्चमा रिट दायर गरेका हुन्।

निर्वाचन आयोगलाई विपक्षी बनाइएको रिटमा राष्ट्रपति र उपराष्ट्रपतिको निर्वाचनको मिति घोषणा गर्दा कानुन उल्लंघन भएको उल्लेख छ। रिट निवेदनमा राष्ट्रपति र उपराष्ट्रपतिको निर्वाचनसम्बन्धी ऐनको दफा ४ ले कार्यकाल सकिनुभन्दा एक महिनाअघि चुनाव गर्नुपर्ने व्यवस्था गरे पनि आयोगबाट त्यसको अवज्ञा भएको उल्लेख छ।

आयोगले आगामी २५ फागुनमा राष्ट्रपति र आगामी ३ चैतमा उपराष्ट्रपतिका निर्वाचन गर्ने तालिका सार्वजनिक गरिसकेको छ।