काठमाडौं– परराष्ट्रमन्त्रीको कार्यभार सम्हालेपछि डा. विमला राई पौड्याल पहिलो पटक श्रीलंका भ्रमणमा निस्कँदै छन्। बिहीबार श्रीलंकाको ७५औं स्वतन्त्रता दिवसमा अवसरमा आयोजना हुने विशेष समारोहमा सहभागी हुन परराष्ट्रमन्त्री पौडेल त्यता जान लागेकी हुन्।
पौड्याल श्रीलंकाली समकक्षी अली साब्रीको निमन्त्रणामा कोलोम्बोमा २०–२१ माघमा हुने विशेष समारोहमा अतिथिको रुपमा सहभागी हुन दिउँसो १२ बजे त्यसतर्फ प्रस्थान गर्ने परराष्ट्र मन्त्रालयले जनाएको छ।
परराष्ट्रमन्त्री पौड्यालले २० माघमा कोलम्बोमा समकक्षीसँग भेटवार्ता गर्नुका साथै स्वतन्त्रता चोकमा राष्ट्रपतिको सचिवालयले आयोजना गर्ने सांस्कृतिक महोत्सव ‘लंकारालंका’मा सहभागी हुने कार्यक्रम छ।
मन्त्री पौड्याल २१ माघमा श्रीलंकाको ७५औं स्वतन्त्रता दिवस समारोहमा सहभागी हुनेछन् भने श्रीलंकाली राष्ट्रपति र प्रधानमन्त्रीसँग शिष्टाचार भेट गर्नेछन्। परराष्ट्र मन्त्री पौड्याल राष्ट्रपतिले राष्ट्रपति भवनमा आयोजना गर्ने स्वागत समारोहमा सहभागिता जनाउनेछन्। परराष्ट्रमन्त्री पौड्याल २५ माघमा स्वदेश फर्कने कार्यतालिका रहेको परराष्ट्रले बताएको छ।